شام میں پھنسے318 پاکستانی وطن واپس پہنچ گئے،وزیر اعظم شہباز شریف نے شام سے پاکستانی شہریوں کی بحفاظت واپسی کو یقینی بنانے کے لیے فوری اقدامات پر متعلقہ حکام کو خراج تحسین پیش کیا۔ تفصیل کے مطابق شام میں پھنسے 318 پاکستانی چارٹرڈ طیارے کے ذریعے پاکستان واپس پہنچے۔چارٹرڈ طیارہ اسلام آباد انٹرنیشنل ایئرپورٹ پر پہنچا، پاکستان پہنچنے پر وفاقی وزیرمنصوبہ بندی احسن اقبال اور اور چیئرمین این ڈی ایم اے لیفٹیننٹ جنرل انعام حیدر ملک نے پاکستانی شہریوں کا استقبال کیا۔اس موقع پر وزیر منصوبہ بندی احسن اقبال نے ائیرپورٹ پر میڈیا سے گفتگو کرتے ہوئے کہا کہ پاکستانیوں کو خیریت سے ملک واپس آنے پر مبارکباد پیش کرتا ہوں۔انہوں نے کہا کہ پاکستانیوں کی باحفاظت واپسی پر لبنان کے وزیراعظم کے شکر گزار ہیں۔شام میں پھنسے تین سو اٹھارہ پاکستانیوں کو بیروت سے چارٹر طیارے کے ذریعے پاکستان روانہ کیا گیا۔وزیراعظم شہباز شریف نے لبنانی وزیراعظم سے رابطہ کرکے شام میں پھنسے پاکستانیوں کے انخلا میں مدد کی اپیل کی تھی جس پر لبنان نے پاکستانی شہریوں کو ویزے جاری کیے ۔ذرائع کے مطابق ان شہریوں کو بذریعہ سڑک شام سے لبنان پہنچایا گیا، جہاں سے انہیں خصوصی طیارے کے ذریعے پاکستان روانہ کیا گیا ۔

بیروت ائیر پورٹ پر پاکستان کے سفیر نے پاکستانی شہریوں کو رخصت کیا۔ دریں اثنا وزیراعظم محمد شہباز شریف نے شام سے پاکستانی شہریوں کی بحفاظت واپسی کو یقینی بنانے کے لیے فوری اقدامات پر متعلقہ حکام کو خراج تحسین پیش کیا۔ وزیراعظم نے خود اس عمل کی نگرانی کی اور شام میں پھنسے پاکستانیوں کے انخلا کے لیے ایک جامع منصوبہ تیار کرنے پر وزارتِ خارجہ اور این ڈی ایم اے کے حکام کی کوششوں کو سراہا۔وزیراعظم محمد شہباز شریف کی خصوصی ہدایت پر نیشنل ڈیزاسٹر مینجمنٹ اتھارٹی( این ڈی ایم اے) اور وزارتِ خارجہ نے شام سے پاکستانی شہریوں کے انخلا کے لیے مشترکہ فلائیٹ آپریشن شروع کیا، جس کے تحت 318 پاکستانی شہریوں کو بیروت، لبنان سے چارٹرڈ طیارے کے ذریعے اسلام آباد پہنچا دیا گیا۔وزیراعظم نے لبنان کے وزیر اعظم نجیب میقاتی کا شکریہ بھی ادا کیا، جنہوں نے بیروت کے راستے پاکستانیوں کی واپسی کے لیے بھرپور تعاون فراہم کیا۔وزیراعظم نے کہا کہ پاکستانی شہریوں کی وطن واپسی حکومت کی اولین ترجیح ہے اور اس حوالے سے مزید اقدامات جاری رہیں گے۔انہوں نے کہا کہ حکومت اپنے شہریوں کی حفاظت اور بہبود کے لیے پرعزم ہے اور ان کے تحفظ کو یقینی بنانے کے لیے تمام ضروری اقدامات کرتی رہے گی۔اسلام آباد پہنچنے والے 318 پاکستانی شہریوں میں زائرین اور دیگر افراد شامل ہیں جنہیں ایک دن پہلے شام سے بیروت، لبنان منتقل کیا گیا تھا۔

کریڈٹ : انڈیپنڈنٹ نیوز پاکستان-آئی این پی