پشاور ہائیکورٹ نے پی ٹی آئی رہنمائوں عالیہ حمزہ، عادل بازئی اور دیگر کی راہداری ضمانت منظور کرتے ہوئے وفاقی حکومت سے 7روز میں مقدمات تفصیلات طلب کرلیں اور آئندہ سماعت تک درخواستگزاروں کو گرفتار نہ کرنے کا حکم دیدیا۔ پشاور ہائیکورٹ عالیہ حمزہ، عادل بازئی اور دیگر کی راہداری ضمانت اور مقدمات تفصیلات کیلئے دائر درخواستوں پر سماعت ہوئی،جسٹس ایس ایم عتیق شاہ اور جسٹس صاحبزادہ اسد اللہ نے سماعت کی،وکیل درخواستگزار نے کہاکہ درخواستگزاروں کیخلاف درج مقدمات کی تفصیل فراہم کی جائے،ڈپٹی اٹارنی جنرل نے کہاکہ یہاں راہداری ضمانت لیتے ہیں پھر عدالتوں میں پیش نہیں ہوتے،جسٹس ایس ایم عتیق شاہ نے کہاکہ درج مقدمات سے متعلق 7دن میں رپورٹ پیش کریں،جسٹس صاحبزادہ اسد اللہ نے کہاکہ رپورٹ پیش کریں ہم ان کو متعلقہ عدالتوں میں پیش ہونے کا حکم دینگے،عدالت نے کہاکہ یہ ان کا بنیادی حق ہے کہ آپ مقدمات کی تفصیل فراہم کریں۔ ڈپٹی اٹارنی جنرل نے کہا کہ ہم رپورٹ پیش کریں گے عدالت ان کو پابند کرے کہ یہ متعلقہ عدالتوں میں پیش ہونگے، عدالت نے دیگر کیسز میں پابند کیا ہے کہ متعلقہ عدالتوں میں پیش ہوں جس پر عدالت نے ریمارکس میں کہا کہ آپ آرڈر پیش کریں ہم ان کو پابند کریں گے یہ وہاں پیش ہوں گے۔بعدازاں عدالت نے وفاقی حکومت سے 7روز میں درج مقدمات کی رپورٹ طلب کرلی،عدالت نے آئندہ سماعت تک درخواستگزاروں کو گرفتار نہ کرنے کا حکم دیدیا۔

کریڈٹ : انڈیپنڈنٹ نیوز پاکستان-آئی این پی