چیئرمین سینیٹ سید یوسف رضا گیلانی نے کہا ہے کہ انصاف میں تاخیر انصاف سے انکار کے مترادف ہے، پاکستان میں انصاف کا حصول بہت مشکل ہے۔ ملتان میں جامعہ زکریا میں تقریب سے خطاب کرتے ہوئے چیئرمین سینیٹ کا کہنا تھا کہ اس تقریب میں آنا باعث اعزاز ہے، آرٹیفیشل انٹیلی جنس پر شعبے پر اثر انداز ہو رہی ہے، دیکھنا ہو گا ٹیکنالوجی کس طرح انصاف کے حصول میں معاون ثابت ہو سکتی ہے۔انہوں نے کہا کہ اے آئی صرف آئیڈیا نہیں حقیقت ہے، قوانین معاشرے میں انصاف کے حصول کے لئے اہم ہوتے ہیں، پاکستان میں انصاف کا حصول بہت مشکل ہے، ہمارے ہاں مقدمات کئی کئی سال التوا کا شکار رہتے ہیں، انصاف میں تاخیر انصاف سے انکار ہوتا ہے۔سید یوسف رضا گیلانی کا مزید کہنا تھا کہ اے آئی کے استعمال سے انصاف بروقت میسر آ سکتا ہے، اے آئی کے استعمال کے آغاز میں مشکلات ہو سکتی ہیں، آرٹیفیشل انٹیلی جنس سے عالمی سطح پر اثرات مرتب ہو رہے ہیں۔ اے آئی سے کروڑوں لوگوں کو سستا اور بروقت انصاف میسر آسکے گا۔ انہوں نے کہا کہ اے آئی کو لیگل سسٹم میں لانے کے لیے پہلے اس کی تربیت لازمی ہے، ٹیکنالوجی تنہا کچھ نہیں کرسکتی، ہمیں مضبوط اداروں کی ضرورت ہے۔یوسف رضا گیلانی نے کہا کہ ہم نے سی پیک کے تحت خطے کو اسپیشل اکنامک زون کا منصوبہ دیا، میرے خطے کو محروم رکھا جائے تو میں خاموش نہیں رہتا۔

کریڈٹ : انڈیپنڈنٹ نیوز پاکستان-آئی این پی