لانس نائیک محمد محفوظ شہید نشان حیدر کا 53 واں یوم شہادت عقیدت واحترام سے منایا گیا ۔ وزیر اعظم شہبازشریف اور پاک فوج کے سربراہان کی طرف سے شہید کو زبردست الفاظ میں خراج عقیدت پیش کیا گیا ۔وزیر اعظم محمد شہباز شریف نے کہا ہے کہ قوم افواج پاکستان کی دفاعِ وطن کیلئے قربانیاں کبھی فراموش نہیں کرے گی۔1971 کی جنگ میں جرات و بہادری کا مظاہرہ کرتے ہوئے جام شہادت نوش کرنے والے لانس نائیک محمد محفوظ شہید نشان حیدر کو وزیراعظم نے ان کے 53 ویں یوم شہادت پر خراج عقیدت پیش کیا ہے۔وزیراعظم نے اپنے بیان میں کہا ہے کہ 1971 میں واہگہ باڈر پر مثالی جوانمردی کا مظاہرہ کرتے ہوئے لانس نائیک محمد محفوظ شہید نشان حیدر دشمن کو پسپا کرتے رہے، لانس نائیک محمد محفوظ شہید نے دشمن کے طاقت اور عددی برتری کے نشے کو خاک میں ملا دیا۔انہوں نے کہا ہے کہ لانس نائیک محمد محفوظ شہید فرض شناسی اور حب الوطنی کی وہ سیسہ پلائی دیوار ثابت ہوئے جس نے وطن عزیز کو دشمنوں کے ناپاک عزائم سے محفوظ رکھا، لانس نائیک محمد محفوظ شہید کا وطن سے عہد وفا اور ملک کے دفاع کی خاطر اپنی جان تک قربان کر دینے کا جذبہ نسل نو کیلئے مشعل راہ ہے۔شہباز شریف نے مزید کہا ہے کہ مجھ سمیت پوری قوم کو پاک فوج کے شہدا اور ان کے اہل خانہ پر فخر ہے، پاکستانی قوم افواج پاکستان کی دفاع وطن کیلئے قربانیاں کبھی فراموش نہیں کرے گی۔

دریں اثنا پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف سٹاف کمیٹی، سروسز چیفس اور افواج پاکستان نے شہید لانس نائیک محمد محفوظ شہید نشان حیدر کو خراج عقیدت پیش کیا۔لانس نائیک محمد محفوظ 25اکتوبر 1944 کو ضلع راولپنڈی کے علاقہ پنڈ ملکاں محفوظ آباد میں پیدا ہوئے، انہوں نے 1962 میں پاک فوج میں شمولیت اختیار کی،71 کی پاک بھارت جنگ کے دوران لانس نائیک محمد محفوظ 10 پنجاب رجمنٹ کے ساتھ منسلک تھے اور واہگہ اٹاری سیکٹر پر تعینات تھے۔انہوں نے بڑی شجاعت اور دلیری کے ساتھ دشمن کا مقابلہ کرتے ہوئے 18 دسمبر 1971 کو جام شہادت نوش کیا، انہیں بہادری کے اعتراف میں پاک فوج نے اعلی ترین اعزاز نشان حیدر سے نوازا۔آئی ایس پی آر کے مطابق لانس نائیک محمد محفوظ شہید کا یوم شہادت غیر معمولی جرات اور غیر متزلزل حب الوطنی کی علامت کے طور پر مناتے ہیں، واہگہ بارڈر پر 1971 کی جنگ کے دوران بہادری اور بے لوث قربانی مسلح افواج کے ناقابل تسخیر جذبے کا مظہر ہے۔پاک فوج کے شعبہ تعلقات عامہ کے مطابق دشمن کی پوزیشنوں پر ان کا بے خوف حملہ غیر معمولی بہادری اور ثابت قدمی کا منہ بولتا ثبوت ہے۔

کریڈٹ : انڈیپنڈنٹ نیوز پاکستان-آئی این پی