کیبنٹ بلاک چوک میں سرکاری ملازمین نے مطالبات کے حق میں دھرنا دے دیا۔ ملازمین کی بڑی تعداد ریلی کی شکل میں احتجاج کرتے ہوئے کیبنٹ بلاک کے سامنے پہنچ گئی، پولیس نے ملازمین کو پالیمنٹ ہاوس کے سامنے جانے سے روک دیا۔ پار لیمنٹ ہاوس جانے والے راستے کو خاردار تاروں سے بند کر دیا گیا، ملازمین کا کہنا ہے کہ ہماری پینشن کے اوپر ڈاکہ ڈالا گیا ہے، اسکولوں اور اداروں کی بندش کی جا رہی ہے۔پولیس نے سرکاری ملازمین کی ریلی کو پارلیمنٹ ہائوس تک جانے سے روک دیا، ریلی کو شاہراہِ دستور پر کیبنٹ بلاک چوک پر روک کر خاردار تاریں لگا دی گئیں۔ سرکاری ملازمین وزارتِ خزانہ کے سامنے احتجاج کے بعد پارلیمنٹ ہائوس تک ریلی نکالنا چاہتے تھے، احتجاج میں اساتذہ وفاقی وزارتوں، ڈویژنز، اداروں کے ملازمین نے شرکت کی۔ آل گورنمنٹ ایمپلائز گرینڈ الائنس کے چیف آرگنائزر رحمان باجوہ نے چارٹر آف ڈیمانڈ پیش کر دیا جس میں مطالبہ کیا گیا کہ وفاقی سرکاری اداروں کے ملازمین کی تنخواہوں میں تفریق ختم کی جائے، صوبائی طرز پر تمام وفاقی ملازمین کی اپگریڈیشن بمع مراعات کی جائے۔چارٹر آف ڈیمانڈ میں مطالبہ کیا گیا کہ لیو انکیشمنٹ اور وفاقی ملازمین کی پینشن اصلاحات واپس لی جائیں، بجٹ 2024-25 میں تنخواہوں پر نافذ کردہ ٹیکس واپس لئے جائیں۔ اسکولوں و اداروں کی بندش و نجکاری کے بجائے بہتر اصلاحات کی جائیں۔چارٹر آف ڈیمانڈ میں مطالبہ کیا گیا کہ اداروں کی نجکاری کے دوران ملازمین کی نوکریوں کا تحفظ یقینی بنایا جائے، دورانِ ملازمت وفات پانے والوں کے بچوں کو بمطابق عدالتی فیصلہ ملازمت دی جائے، ظالمانہ پنشن اصلاحات کو فی الفور واپس لیا جائے۔

کریڈٹ: انڈیپنڈنٹ نیوز پاکستان-آئی این پی