ضلع خیبر کی تحصیل باڑہ بازار کے تحصیل کمپانڈ میں دو خودکش دھماکوں میں 2 پولیس اہلکار شہید اور اہلکاروں سمیت 9 افراد زخمی ہوگئے۔ آئی جی خیبرپختونخوا کا کہنا ہے کہ دو خودکش بمباروں نے مرکزی اور عقبی دروازوں سے داخلے کی کوشش کی۔ پولیس کے مطابق ضلع خیبر کی تحصیل باڑہ کے سرکاری کمپانڈ دفتر پر شرپسندوں نے حملہ کیا۔ رپورٹ کے مطابق علاقے میں تھانہ اور سرکاری دفاتر موجود ہیں۔ سما ٹی وی کے مطابق خیبر باڑہ بازار کے قریب تحصیل کمپانڈ میں دھماکے میں 2 پولیس اہلکار شہید اور 7 اہلکاروں سمیت 9 افراد زخمی ہوگئے۔ رپورٹ کے مطابق دھماکے میں زخمی ہونے والوں میں ایک کو سی ایم ایچ، تین کو مقامی اسپتال منتقل کیا گیا ہے جبکہ دیگر 6 زخمیوں کو موقع پر طبی امداد فراہم کی گئی۔ آئی جی خیبرپختونخوا اختر حیات کا کہنا ہے کہ خفیہ ایجنسی نے پیشگی اطلاع دی ہوئی تھی، تھریٹ الرٹ 13 جولائی کو موصول ہوا تھا، باڑہ تحصیل کمپانڈ میں 2 خود کش حملہ آوروں نے داخل ہونے کی کوشش کی، خودکش دھماکے سے عمارت کو نقصان پہنچا۔ انہوں نے کہا کہ ایک حملہ آور نے مرکزی دروازے، دوسرے نے عقب سے داخلے کی کوشش کی، ڈی این اے کیلئے حملہ آوروں کے اعضا کے نمونے حاصل کرلئے، دہشت گرد بڑے پیمانے پر تباہی پھیلانے میں ناکام رہے۔ ایس پی ورسک ارشد خان کا کہنا ہے کہ نفری تبدیل ہوتے وقت پولیس پر فائرنگ کی گئی، پولیس اہلکاروں پر 17 گولیاں فائر کی گئیں، فائرنگ کے بعد حملہ آور فرار ہوگئے جن کے تلاش کیلئے علاقے میں سرچ آپریشن جاری ہے۔ یاد رہے کہ دو روز قبل بھی خیبرپختونخوا کے دارالحکومت پشاور کے علاقے حیات آباد میں سیکیورٹی فورسزکی گاڑی کے قریب خود کش دھماکے کے نتیجے میں8 افراد زخمی ہوگئے۔ خیال رہے کہ رواں سال خیبرپختونخوا میں دہشت گردی کے واقعات میں تشویشناک حد تک اضافہ ہوا ہے۔ صوبے بھر میں مختلف دہشت گرد حملوں میں اب تک سال 146 پولیس اہلکار شہید ہوئے ہیں۔

کریڈٹ: انڈیپنڈنٹ نیوز پاکستان-آئی این پی