پاکستان پیپلزپارٹی کے سینئر رہنما سید خورشید احمد شاہ نے کہا کہ 24 نومبر کے احتجاج پر اعتراض نہیں اگر پر تشدد احتجاج ہوا تو ذمہ داری پی ٹی آئی اور اسکے بانی کی ہوگی۔ایک نجی ٹی وی سے گفتگو کرتے ہوئے خورشید شاہ نے کہاکہ حیدر آباد موٹروے آج کا ایشو نہیں ہے، 1988 میں نواز شریف سے مشورہ ہوا کہ موٹر وے بنائیں، ہماری کوشش تھی کہ موٹروے سندھ سے شروع ہو کیوں کہ سمندر سندھ میں ہے۔سینئر رہنما پی پی نے کہا کہ گوادر اور کراچی ہمارے حب ہیں، مگر افسوس ہے دونوں صوبوں میں موٹر وے نہیں بنی، 34 سال کے عرصے میں موٹروے اپنا خرچہ نکال کر منافع میں چل رہی ہوتی، موٹرویز ملکی معیشت کی ریڑھ کی ہڈی ہوتی ہیں، ہمارے سندھ والوں کی بدبختی ہے کہ سندھ سے موٹروے شروع نہیں ہوئی۔ان کا کہنا تھا کہ میں نے وفاقی حکومت سے بات کی ہے کہ سندھ میں موٹروے پر جلد کام شروع کریں، جو ہم نے قانون سازی کی ہے عدالتیں اس کے مطابق اپنا کام کر رہی ہیں۔

کریڈٹ: انڈیپنڈنٹ نیوز پاکستان-آئی این پی