مشیر امور کشمیر و گلگت بلتستان قمر زمان کائرہ نے کہا ہے کہ پاکستان مشکل ترین حالات سے گزر رہا ہے،سیلاب کے باعث سندھ اور بلوچستان میں قیامت کا سماں ہے، نقصانات کا جائزہ لینے کیلئے جلد سروے کا آغاز کیا جارہا ہے۔قمر زمان کائرہ نے گلگت میں تقریب سے خطاب کرتے ہوئے کہا کہ سیلاب کے باعث ملک کا آدھا حصہ متاثر ہوا ہے، وفاقی اور صوبائی حکومتوں جلد بحالی کے لیے بھرپور کوشش کر رہی ہیں۔ انہوں نے کہا کہ گلگت بلتستان میں بھی سیلابی صورتحال کے باعث جانی و مالی نقصان ہوا ہے، سیلاب کے باعث سندھ اور بلوچستان میں قیامت کا سماں ہے، سندھ میں حد نگاہ تک پانی ہی پانی ہے۔ مشیر امور کشمیر کا کہنا ہے کہ سیلاب سے ہونے والے نقصانات کا جائزہ لینے کے لیے جلد سروے کا آغاز کیا جا رہا ہے، سروے ٹیم میں سول اداروں کے ساتھ فوج کی ٹیم بھی شامل ہو گی۔ قمر زمان کائرہ نے کہا کہ سروے کے معمالات میں کسی قسم کا امتیاز نہیں برتا جائے گا، ارادہ ہے کہ سب سے پہلے سروے گلگت بلتستان اور خیبر پختونخوا کا کیا جائے۔ انہوں نے مزید کہا کہ وزیراعظم پاکستان سیلاب سے ہونے والے نقصانات کا جائزہ لینے کے لیے گلگت بلتستان کا دورہ کر رہے ہیں، ہر متاثرہ خاندانِ کو 25 ہزار روپے دیئے جا رہے ہیں اور جاں بحق ہونے والوں کے لواحقین کو 10 لاکھ روپے دیئے جا رہے ہیں۔

کریڈٹ: انڈیپنڈنٹ نیوز پاکستان-آئی این پی