فیصل آباد میں مزدوروں نے اجرت نہ بڑھائے جانے پر کام چھوڑ احتجاج کرتے ہوئے700 سے زائد یونٹس بند کردیئے۔ فیصل آباد میں پاور لومز ورکرز نے مہنگائی اور اجرتوں میں اضافہ نہ ہونے پرتنگ آکر فیکٹریوں کو تالے لگا دئیے۔ دو ماہ قبل اجرت میں 25 فیصد اضافے کا اعلان ہوا تھا تاہم مزدور اپنی محنت کی کمائی سے محروم رہے۔ فیکٹری مالکان کے مطابق معاشی بدحالی سے دیوالیہ ہوتے صنعت کارحکومتی ریلیف کے منتظر ہیں۔ ورکرز کے مطابق مطالبات منظور نہ ہونے تک کام چھوڑ ہڑتال جاری رہے گی۔ چیئرمین پاور لومز ایسوسی ایشن وحید خالق رامے کے مطابق ضلعی انتظامیہ کی معاونت سے اجرت میں اضافے کے لیے مذاکرات جاری ہیں اور امید ہے کہ جلد معاملات حل ہوجائیں گے۔ پاور لومز فیکٹریاں بند ہونے سے نہ صرف مزدوروں کے چولہے ٹھنڈے پڑے ہیں بلکہ مالکان کو بھی روزانہ لاکھوں روپے کا نقصان ہورہا ہے۔

کریڈٹ:
انڈیپنڈنٹ نیوز پاکستان-آئی این پی