ترکیہ کے صدر رجب طیب اردوان نے کہا ہے کہ امریکی صدر ڈونلڈ ٹرمپ کی انتظامیہ مشرق وسطی سے متعلق غلط اندازے لگا رہی ہے اور صیہونیوں کے جھوٹ سے تنازعات صرف شدت اختیار کریں گے۔غیرملکی خبر رساں ادار ے کے مطابق صدر اردوان نے غیرملکی دوروں سے واپسی پر صحافیوں سے بات چیت میں کہا کہ بدقسمتی سے امریکہ ہمارے خطے سے متعلق غلط اندازے لگا رہا ہے۔ انہوں نے مزید کہا کہ کسی بھی ایسے نقطہ نظر کا حصہ نہیں بننا چاہیے جو خطے کی تاریخ اور اقدار کو نظرانداز کرتا ہے۔ صدر طیب اردوان نے امید کا اظہار کیا کہ ٹرمپ انتخابی مہم کے دوران کیے گئے وعدوں کو پورا کریں گے اور نئے تنازعات کھڑے کرنے کے بجائے امن کے لیے اقدامات کریں گے۔انہوں نے مزید کہا کہ اسرائیل اور حماس کے درمیان امن معاہدے کے باوجود غزہ میں جنگ بندی کی حقیقی معنوں میں علامات نہیں نظر آتیں اور مسلمان ممالک ابھی تک اس معاملے پر اجتماعی قدم نہیں اٹھا سکے۔

کریڈٹ: انڈیپنڈنٹ نیوز پاکستان-آئی این پی