چین کی ایک عدالت نے چینی فٹبال ایسوسی ایشن کے سابق نائب صدر لی یویی کو رشوت خوری کا جرم ثابت ہونے پر 11 سال قید کی سزا سنائی ہے۔ چین کے وسطی صوبے ہوبے کے شہر جنگ ژو میں انٹرمیڈیٹ پیپلز کورٹ کے جاری کردہ ایک بیان کے مطابق لی پر 10 لاکھ یوآن (تقریبا ایک لاکھ 39 ہزار 860 امریکی ڈالر) کا جرمانہ عائد کیا گیا ہے جبکہ رشوت سے حاصل شدہ غیر قانونی فوائد ضبط کرکے انہیں سرکاری خزانے میں جمع کرادیا جائے گا۔ ادھر ہوبے کی جیایو کانٹی کی عوامی عدالت نے ووہان فٹبال ایسوسی ایشن کے سابق ایگزیکٹو نائب صدر اور سیکرٹری جنرل فو شیانگ کو بھی غبن، رشوت لینے اور دینے کے جرم میں 11 سال قید کی سزا سنائی ہے۔ عدالتی بیان کے مطابق ووہان فٹبال انتظامی مرکز کے سابق سربراہ فو پر 14 لاکھ یوآن کا جرمانہ عائد کیا گیا ہے ۔ ان کی غبن کردہ رقم واپس لیکر اور رشوت سے حاصل شدہ غیر قانونی فائدے ضبط کرکے سرکاری خزانے میں جمع کرادی گئی ہے۔

کریڈٹ: انڈیپنڈنٹ نیوز پاکستان-آئی این پی