امریکی فوج نے گرین لینڈ میں قائم اپنے فوجی اڈے پٹفِک اسپیس بیس کی کمانڈر کرنل سوزن مائرز کو عہدے سے ہٹا دیا۔امریکی اخبار کی رپورٹ کے مطابق کرنل مائرز کی برطرفی کی وجہ ان کا ٹرمپ انتظامیہ کی گرین لینڈ سے متعلق پالیسی سے مبینہ انحراف بتایا جا رہا ہے۔ پینٹاگون کے ترجمان کے مطابق، صدر ڈونلڈ ٹرمپ کے ایجنڈے سے ہٹ کر کسی بھی طرزِ عمل کو وزارت دفاع میں برداشت نہیں کیا جائے گا۔امریکی اخبار کا بتانا ہے کہ کرنل سوزن مائرز کو جمعرات کے روز اس وقت برطرف کیا گیا جب امریکی فوج کے حوالے سے رپورٹنگ کرنے والی ایک آزاد نیوز ویب سائٹ نے ایک رپورٹ میں ان کی ای میل کا ذکر کیا۔ اس ای میل میں کرنل مائرز نیامریکی نائب صدر جے ڈی وانس کے 28 مارچ کے دورے کے بعد فوجی اڈے کے اہلکاروں کو لکھا کہ نائب صدر کی باتیں پٹفک اسپیس بیس کی نمائندگی نہیں کرتیں۔صدر ٹرمپ نے عہدہ سنبھالنے کے بعد سے گرین لینڈ (جو ڈنمارک کا خودمختار علاقہ ہے) پر امریکی کنٹرول کی خواہش ظاہر کررکھی ہے جس پر ڈنمارک اور گرین لینڈ کے سیاستدانوں نے شدید اعتراضات کیے ہیں۔ نائب امریکی صدر جے ڈی وانس نے پٹفک بیس میں اپنی تقریر کے دوران ڈنمارک پر تنقید کی تھی

جس پر مقامی سطح پر شدید ردعمل سامنے آیا۔مذکورہ رپورٹ کے مطابق کرنل مائرز نے بیس کے اہلکاروں کو لکھا تھا میں موجودہ سیاسی حالات کو سمجھنے کی دعویدار نہیں ہوں لیکن میں اتنا ضرور جانتی ہوں کہ نائب صدر وانس نے جن معاملات کا ذکر کیا وہ پٹفک اسپیس بیس کی سوچ کی نمائندگی نہیں کرتے۔ رپورٹ کے مطابق کرنل مائرز کی برطرفی کے اس اقدام کو صدر ٹرمپ کی زیر قیادت جاری فوجی قیادت میں تبدیلیوں کا حصہ سمجھا جا رہا ہے جس میں اب تک 5 خواتین سمیت کم از کم 10 سینئر افسران کو برطرف کیا جا چکا ہے۔ رواں ماہ کے آغاز میں نیٹو میں امریکی ملٹری کمیٹی کی نمائندہ ایک نیوی ایڈمرل کو بھی عہدے سے ہٹا دیا گیا تھا۔امریکی اسپیس فورس کے بیان میں کہا گیا ہے کہ کرنل مائرز کو ان کی قیادت کرنے کی صلاحیت پر عدم اعتماد کی بنیاد پر برطرف کیا گیا ہے، بیان میں مزید کہا گیا کہ کمانڈرز سے توقع کی جاتی ہے کہ وہ اعلی اخلاقی معیار پر پورا اتریں، خصوصا جب بات غیر جانبدار رہنے کی ہو۔پینٹاگون کے ترجمان شان پارنل نے سوشل میڈیا پلیٹ فارم ایکس پر پوسٹ میں مائرز کی برطرفی کی تصدیق کرتے ہوئے کہا کہ صدر ٹرمپ کے ایجنڈے کو کمزور کرنے یا چین آف کمانڈ کو نقصان پہنچانے کی کوششیں محکمہ دفاع میں کسی صورت قابلِ قبول نہیں۔ رپورٹ کے مطابق کرنل مائرز کو پٹفک بیس سے ہٹا کر کسی اور جگہ تعینات کر دیا گیا ہے۔

کریڈٹ: انڈیپنڈنٹ نیوز پاکستان-آئی این پی