خیبر پختونخوا حکومت نے شہدا کے بچوں اور بیوہ کی بھرتیوں سے متعلق نیا ترمیمی رول جاری کر دیا۔ترمیم کا نوٹیفکیشن اسٹیبلشمنٹ ڈپارٹمنٹ نے باضابطہ طور پر جاری کر دیا جس کے مطابق دہشتگردی میں شہید سرکاری ملازمین کے بچوں یا بیوہ کی براہ راست تقرری کی اجازت ہوگی۔اعلامیے میں بتایا گیا کہ صوبائی کیڈر میں گریڈ 3 تا 11 اور ضلعی کیڈر میں گریڈ 3 تا 12 تک تقرری ممکن ہوگی، شہید ملازم کا بچہ عمر پوری نہ کرے تو بیوہ کو ترجیحی بنیادوں پر نوکری دی جائے گی۔نوٹیفکیشن کے مطابق تعیناتی کیلئے متعلقہ پوسٹ کی کم از کم تعلیمی قابلیت لازمی قرار ہے، 2 بیویوں کی صورت میں بزرگ بیوہ کو ترجیح دی جائے گی، متعدد آسامیوں کی دستیابی پر امیدوار کو زیادہ گریڈ والی آسامی دی جائے گی۔اس میں مزید کہا گیا کہ تقرری صرف دستیاب خالی آسامیوں کی بنیاد پر ممکن ہوگی، نیا قانون پبلک سروس کمیشن کے دائرہ کار میں آنے والی پوسٹوں پر لاگو نہیں ہوگا۔

کریڈٹ: انڈیپنڈنٹ نیوز پاکستان-آئی این پی