پیپلزپارٹی کی سینیٹر شیری رحمان نے کہا ہے کہ صدر مملکت ڈاکٹر عارف علوی قومی اسمبلی کا اجلاس نہ بلا کر پی ٹی آئی کے حلف کی پاسداری کررہے ہیں، آئین کے آرٹیکل (2) 91کے تحت الیکشن کے بعد 21دن تک اجلاس بلانا لازمی ہے، آئین میں اجلاس کو کسی زیر التوا معاملے سے مشروط نہیں کیا گیا،نائب صدر پیپلز پارٹی سینیٹر شیری رحمان نے کہا کہ چند روز پہلے صدر عارف علوی کو قومی اسمبلی کا اجلاس بلانے کی سمری بھیجی تھی تاہم صدر نے تاحال سمری پر دستخط نہیں کئے، صدر کی جانب سے اجلاس کو مخصوص نشستوں کے فیصلے سے مشروط کرنا قابل افسوس ہے،انہوں نے کہا کہ عارف علوی کا دور پہلے ہی تنازعات کا شکار رہا ہے، جانے سے پہلے بھی وہ صدارتی نہیں تحریک انصاف کے حلف کی پاسداری کر رہے ہیں، آئین کے آرٹیکل (2) 91کے تحت الیکشن کے بعد 21دن تک اجلاس بلانا لازمی ہے، آئین میں اجلاس کو کسی زیر التوا معاملے سے مشروط نہیں کیا گیا۔شیری رحمان نے کہا کہ عارف علوی نے ہمیشہ آئینی بحران پیدا کرنے کی کوشش کی ہے، ان کو جانے سے پہلے ایسے کسی بھی غیر آئینی اقدام سے گریز کرنا چاہیے۔

کریڈٹ: انڈیپنڈنٹ نیوز پاکستان-آئی این پی