محکمہ ہائرایجوکیشن نے پنجاب بھر کے کالجز کو سیکیورٹی بڑھانے کیلئے اقدامات کی ہدایت کردی۔ کالجز کو ایک گیٹ سے مرکزی داخلے، دیگر تمام دروازے بند رکھنے کا حکم دیا گیا ہے، اس کے علاوہ کالجز میں داخلے کے وقت تمام بیگز، گاڑیاں چیک کرنے کی ہدایت کی گئی ہے۔ محکمہ داخلہ کے حکم پرمحکمہ ہائرایجوکیشن کی سیکیورٹی اقدامات کی ہدایت کی گئی ہے۔ جاری مراسلے کے مطابق پنجاب کے کالجز کے داخلی راستوں پر واک تھرو گیٹس، میٹل ڈٹیکٹرز استعمال کرنے کا حکم بھی دیا گیا ہے، طلبا اور عملے کو ہروقت اپنے شناختی کارڈز ساتھ رکھنے ہوں گے، کالجز میں اسٹیکرز کے بغیر گاڑیوں کے داخلے پر پابندی عائد ہوگی۔ مراسلے میں کہا گیا ہے کہ کالجز کی سرحدی دیواروں پر خاردار تاریں نصب کی جائیں، رات کے اوقات میں تمام کالجز کے احاطے میں روشنی کا انتظام کیا جائے

تمام کالجز کو مناسب سی سی ٹی وی کیمرے نصب کرنے اور 24 گھنٹے فعال رکھنے کا حکم بھی دیا گیا ہے۔ مراسلے میں مزید کہا گیا ہے کہ طلبا کی تعداد کی بنیاد پر کالجز کو سیکیورٹی عملہ بڑھانے کا حکم دیا گیا ہے، اس کے علاوہ کہا گیا ہے کہ آگ بجھانے کے آلات، فائر الارمز تمام عمارتوں میں نصب کیے جائیں، ہنگامی صورتحال سے نمٹنے کے لیے اساتذہ اور طلبا کی ٹریننگ کا حکم بھی جاری کیا گیا ہے۔ یہ بھی پڑھیں:افغان طالبان رجیم اور فتنہ الخوارج کے اسلام کے لبادہ میں چھپے مکروہ چہرے بے نقاب فیڈرل ڈائریکٹوریٹ آف ایجوکیشن کی جانب سے اسلام آباد کے تمام اسکولز، کالجز کو سیکیورٹی انتظامات ازسرِنو مضبوط کرنے کی ہدایت کی گئی ہے۔ ایف ڈی ای نے تمام اداروں کو ہفتہ وار سکیورٹی رپورٹ جمع کرانے کا حکم دیدیا گیا،سیکیورٹی ہدایات پر عمل نہ کرنے والوں کے خلاف کارروائی ہوگی۔

کریڈٹ: انڈیپنڈنٹ نیوز پاکستان-آئی این پی