وزیر اعلی خیبرپختونخوا محمد سہیل آفریدی نے صوبے میں نرسز کی بڑھتی ہوئی طلب کے پیش نظر نرسنگ ایمرجنسی نافذ کرنے کا اعلان کیا اور نرسز کی خالی اسامیوں پر ایٹا کے ذریعے بلاتاخیر بھرتیاں یقینی بنانے کی ہدایت جاری کی۔وزیر اعلی کے پی کی زیر صدارت محکمہ صحت کے اہم اجلاس میں شعبہ صحت کی مجموعی صورتحال، جاری اصلاحات اور مستقبل کی ضروریات کا تفصیلی جائزہ لیا گیا۔اجلاس کے دوران وزیر اعلی نے ہسپتالوں اور مراکز صحت میں ڈاکٹرز اور سپیشلسٹس کی کمی کو پورا کرنے کیلئے بھرتیوں کا جاری عمل بھی جلد مکمل کرنے کی ہدایت کی اور واضح کیا کہ بھرتیوں کے مجموعی عمل میں میرٹ اور شفافیت پر کوئی سمجھوتہ نہ کیا جائے۔انہوں نے کہا کہ پشاور، کوہاٹ اور ملاکنڈ میں کثیر بیڈز پر مشتمل نئے ہسپتالوں کے قیام کا جائزہ لیا جائے اور اس سلسلے میں قابل عمل تجاویز پیش کی جائیں، حکومت وسائل کی کمی کو صحت عامہ کی بہتری کی راہ میں رکاوٹ نہیں بننے دے گی۔

کریڈٹ: انڈیپنڈنٹ نیوز پاکستان-آئی این پی