این ڈی ایم اے کے نیشنل ایمر جنسیز آپریشن سینٹر نے ملک کے مختلف علاقوں میں اسموگ کی ممکنہ صورتحال پر الرٹ جاری کر دیا۔ملک میں بڑھتی ہوئی اسموگ کی صورتحال کے باعث متعدد شہروں میں ٹریفک کی روانی متاثر ہونے کا امکان ہے، پنجاب میں لاہور، فیصل آباد، ملتان، بہاولپور، سیالکوٹ، گوجرانوالہ اور شیخوپور میں دھند اسمو گ میں شدید اضافہ متوقع ہے۔راولپنڈی، اسلام آباد سمیت خیبر پختونخواہ کے متعدد علاقوں اور سندھ کے بالائی علاقوں میں بھی دھند میں شدید اضافہ متوقع ہے۔20 دسمبر تک رات اور الصبح کے اوقات میں دھند کے باعث حد نگاہ کم ہو گی حد نگاہ کم ہونے کے باعث ٹریفک حادثات کے امکانات بڑھ جاتے ہیں لہذا محتاط رہیں۔ڈرائیور حضرات شدید دھند کے اوقات میں غیر ضروری سفر سے گریز کریں دھند کی صورت میں ٹریفک حادثات سے بچا ئوکیلئے احتیاطی تدابر اپنائیں۔این ڈی ایم اے نے تمام متعلقہ اداروں کو دھند کے اثرات سے بچا ئوکیلئے خصوصی اقدامات کی ہدایات جاری کردیں۔این ڈی ایم اے تمام ممکنہ خطرات سے نمٹنے کیلئے پیشگی اقدامات یقینی بنا رہا ہے این ای او سی کی جانب سے تمام متعلقہ ادارو ں کو ممکنہ خطرات سے نمٹنے کیلئے ضروری معلومات کی فراہمی بھی یقینی بنا ئی جا رہی ہے۔ دوسری جا نب ملک کے مختلف شہروں میں دھند کے ڈیرے برقرار ہیں، دھند کے باعث ٹریفک حادثات میں 3 افراد جاں بحق جبکہ 20 زخمی ہوئے ہیں۔

بس الٹنے سے تین افراد جاں بحق جبکہ 15 زخمی ہو گئے، زخمیوں کو رحیم یار خان کے ہسپتال منتقل کر دیا گیا، متعدد کی حالت تشویشناک بتائی گئی ہے، ظاہر پیر انٹرچینج کے قریب بھی بس الٹ گئی جس کے باعث 5 مسافر زخمی ہو گئے۔ ادھر موٹرویز متعدد مقامات سے بند کر دی گئی ہے، موٹروے ایم 2 لاہور سے ہرن مینار، ایم 3 فیض پور سے رجانہ تک بند کر دی گئی ہے، موٹروے ایم 4پنڈی بھٹیاں سے ملتان اور ایم 5 ملتان سے روہڑی تک دھند کی وجہ سے بند کی گئی ہے۔قومی شاہراہوں پر بھی حد نگاہ کم ہونے سے ٹریفک کی روانی متاثر ہے، مانگا منڈی، پتوکی، اوکاڑہ اور ساہیوال میں دھند کا راج ہے، اس کے علاوہ چیچہ وطنی، میاں چنوں، خانیوال، ملتان، لودھراں، بہاولپور، رحیم یار خان ا ور صادق آباد میں بھی دھند کے ڈیرے ہیں۔ترجمان موٹروے پولیس کا کہنا ہے کہ شہری غیر ضروری سفر سے گریز اور فوگ لائٹس کا استعمال یقینی بنائیں۔ علاوہ ازیں ملک کے مختلف شہروں میں فضائی آلودگی برقرار ہے، لاہور میں ایئر کوالٹی انڈیکس 224 ریکارڈ کیا گیا ہے، فیصل آباد میں اے کیو آئی 273، گجرات میں 270 ریکارڈ کیا گیا، جبکہ خیبرپختونخوا کی فضا بھی آلودہ ہے، پشاور میں ایئر کوالٹی انڈیکس 258 تک پہنچ گیا ہے۔

کریڈٹ: انڈیپنڈنٹ نیوز پاکستان-آئی این پی