قومی اسمبلی کے 6 اور صوبائی اسمبلی کے7 حلقوں پر ضمنی انتخابات کا دنگل آج (اتوار کو) سجے گا ۔ ضمنی انتخابات میں امیدواروں کے درمیان کانٹے دار مقابلہ متوقع ہے ،اس موقع پر سیکورٹی کے سخت ترین انتظامات کئے گئے ہیں ،سول آرمڈ فورسز اور پاک فوج بھی تعینات ہوگی۔ الیکشن کمیشن کے مطابق قومی اسمبلی کی 6 اور پنجاب اسمبلی کی 7 نشستوں پر آج ووٹ ڈالے جائیں گے ۔اس ضمن میں تمام تر انتظامات مکمل کرلئے گئے ہیں ۔ قومی اسمبلی کے حلقوں این اے 18 ہری پور ، این اے 96 فیصل آباد ، این اے 104 فیصل آباد ، این اے 129 لاہور، این اے 143 ساہیوال اور این اے 185 ڈی جی خان میں ضمنی الیکشن ہوگا۔پنجاب اسمبلی کی پی پی 98 بھکر ، پی پی 115 اور 116 فیصل آباد، پی پی 73 سرگودھا ، پی پی 87 میانوالی، پی پی 203 ساہیوال اور پی پی 269 مظفرگڑھ پر بھی آج ووٹنگ ہوگی۔

وزارت داخلہ نے ضمنی الیکشن کے روز سول آرمڈ فورسز اور پاک فوج کی تعیناتی کا آرڈر جاری کر رکھا ہے ۔نوٹیفکیشن کے مطابق ضمنی الیکشن کے دن سے عام فورسز دوسرے درجے پر بطور کوئیک ری ایکشن فورس تعینات رہیں گی۔ ضمنی الیکشن کے دن پاکستانی فوج بطور کوئیک ری ایکشن فورس تیسرے درجے پر تعینات ہوگی۔الیکشن کمیشن نے بھی پاکستان آرمی، سول آرمڈ فورسز اور مقامی پولیس کی تعیناتی کا نوٹیفکیشن جاری کیا ہے اور نامزد عسکری و سول افسران کو مجسٹریٹ درجہ اول کے اختیارات بھی تفویض کیے ہیں۔انتخابی حلقوں میں فوجی دستے 22 سے 24 نومبر تک موجود رہیں گے۔ضمنی انتخابات میں این اے 129 میں ن لیگ کے حافظ نعمان اور آزاد امیدوار ارسلان احمد میں کڑا مقابلہ متوقع ہے، این اے 18 ہری پور میں عمر ایوب کی اہلیہ اور مسلم ن لیگ کے بابر نواز میں کانٹے کے مقابلے کا امکان ہے۔

کریڈٹ: انڈیپنڈنٹ نیوز پاکستان-آئی این پی