رکن قومی اسمبلی شیرافضل مروت نے کہا ہے کہ میری اطلاعات ہیں کہ بشری بی بی کی رہائی کیلئے پیشکش ہوئی ہے۔انٹرویو میں شیرافضل نے دعوی کیا کہ پہلے بھی رہائی کیلئے پیشکش ہوئی تھی بانی اور بشری بی بی نے انکار کیا تھا۔شیرافضل مروت نے کہا کہ علی امین گنڈاپور بااختیار وزیراعلی رہے جس کی انھوں نے قیمت ادا کی، پی ٹی آئی کی قیادت کو بے اختیار وزیراعلی عثمان بزدار جیسے لوگ سوٹ کرتے ہیں۔انھوں نے کہا کہ سہیل آفریدی کو جانتا ہوں بانی جو حکم دیں گے وہ اس پر من وعن عمل کرینگے، وزیراعلی خیبر پختونخوا کے پاس کسی کو ٹرانسفرکرنے کے اختیارات ہیں۔سابق پی ٹی آئی رہنما نے کہا کہ 7مرتبہ سہیل آفریدی اڈیالہ جیل آئے پھر بھی ملاقات نہیں کرائی گئی، میری نظرمیں اب سہیل آفریدی کو اڈیالہ جیل نہیں آنا چاہیے، بار بار روکنے کی وجہ سے وزیراعلی کے منصب کی بے توقیری ہورہی ہے۔شیرافضل مروت نے کہا کہ کہیں ایسا تو نہیں کہ سہیل آفریدی کو ہٹانے کیلئے نیا طریقہ ایجاد کیا جارہا ہے، الیکشن کمیشن نے آج تک انتخابات میں تاخیر سے متعلق تو وضاحت نہیں کی۔انھوں نے کہا کہ الیکشن میں پہلے ڈرامے ہوئے اسی لئے خدشے کے پیش نظر وارننگ ضروری تھی، الیکشن کمیشن پی ٹی آئی کیخلاف فریق ہے کون ان پر اعتماد کریگا، خیبر پختونخوا میں میرے خلاف بھی سیاسی کیسز ہیں جو ابھی تک ختم نہیں کیے گئے۔

کریڈٹ: انڈیپنڈنٹ نیوز پاکستان-آئی این پی