اے این ایف انٹیلیجنس اور اینٹی نارکوٹکس فورس(اے این ایف)اسلام آباد نے مشترکہ کارروائی کرتے ہوئے بھاری مقدار میں منشیات برآمد کرلی۔ اینٹی نارکوٹکس فورس نے کارروائی کے دوران موٹروے انٹرچینج اسلام آباد کے قریب مزدا ٹرک سے 106 کلوگرام سے زائد منشیات برآمد کی۔ اے این ایف ذرائع کے مطابق برآمدشدہ منشیات میں 62 کلو 400 گرام چرس اور 44 کلو 400 گرام افیون شامل ہے۔ شیخوپورہ کے رہائشی غلام مرتضی نامی ٹرک ڈرائیور کو گرفتار کر کے مقدمہ درج کر لیا گیا ہے۔ دوسری کارروائی میں اے این ایف نے جی ٹی روڈ اٹک پر ملزم کے قبضے سے 5کلوگرام چرس برآمد کی۔ اے این ایف حکام نے بتایا کہ اپر دیر کے رہائشی سجاد احمد نامی ملزم کے خلاف مقدمہ درج کر لیا گیا ہے۔

کریڈٹ:
انڈیپنڈنٹ نیوز پاکستان