اقوام متحدہ(شِنہوا)اقوام متحدہ کے سیکرٹری جنرل انتونیو گوتریس نے کولمبیا کی حکومت اور 5 مسلح گروپوں کے درمیان 6 ماہ کی جنگ بندی کے اعلان کا خیر مقدم کیا ہے۔

کولمبیا کے صدر گسٹاؤ پیٹرو نے سال نو کے موقع پر 5 باغی گروہوں کے ساتھ یکم جنوری سے 30 جون 2023ء تک دوطرفہ جنگ بندی کے معاہدے کا اعلان کرتے ہوئے کہا کہ مذاکرات میں پیش رفت کے لحاظ سے جنگ بندی میں توسیع کی جا سکتی ہے۔

انتونیو گوتریس کے ترجمان اسٹیفن ڈوجارک نے ایک بیان میں کہا کہ جنگ بندی ایک ایسی پیشرفت ہے جو نئے سال کے آغاز کے ساتھ  کولمبیا کے عوام کیلئےجامع امن کی نئی امید لے کر آئی ہے۔ سیکرٹری جنرل کو اس بات کی امید ہے کہ ان وعدوں پر عمل کرنے سے تشدد اور تنازعات سے متاثرہ کمیونٹیز کے مصائب میں کمی آئے گی جبکہ جاری بات چیت میں اعتماد کی فضاء پیدا کرنے میں مدد ملے گی۔

بیان میں کہا گیا کہ سیکرٹری جنرل نے کولمبیا کی جانب سے مکمل اور دیرپا امن کے حصول کی کوششوں کیلئے اقوام متحدہ کی حمایت کا اعادہ کیا ہے۔