اقوام متحدہ (شِنہوا) اقوام متحدہ کے سیکرٹری جنرل انتونیو گوتریس نے خبردار کیا ہے کہ انتہائی دائیں بازو کا نظریہ مغربی ملکوں میں دہشت گردی کا سب سے بڑا ذریعہ ہے۔
نیویارک میں اقوام متحدہ کے ہیڈ کوارٹر میں سال کی آخر ی پریس کانفرنس سے خطاب کرتے ہوئے انہوں نے کہا کہ اس بات کاعملی طور پرمظاہرہ ہوا ہے کہ آج مغربی ملکوں میں دہشت گردی کا سب سے بڑا خطرہ انتہائی دائیں بازو، نیو نازی ازم اور سفید فام بالادستی سے ہے۔
انہوں نے کہا کہ میں سمجھتا ہوں کہ ہمیں مغربی معاشروں اور دنیا کے دیگر حصوں میں بھی بڑھتی ہوئی نیو نازی ازم اور سفید فام بالادستی، یہود یوں کے ساتھ دشمنی اور مسلم دشمنی کی کسی بھی صورت کی مذمت کرنے میں بہت واضح اور بہت قوی ہونا چاہئے ۔ یہ واضح طورپرایک خطرہ ہے اور ہمیں اس خطرے کا زبردست عزم کے ساتھ مقابلہ کرنا چاہیے۔
انہوں نے کہا کہ دنیا بھر کے جمہوری معاشروں کے لیے انتہائی دائیں بازو کی جانب سے جرمن حکومت کا تختہ الٹنے کے لئے بغاوت کی کوششیں خطرے کی صرف ایک مثال ہے۔
گوتریس نے کہا کہ سوشل میڈیا پلیٹ فارمز کی ایک خاص ذمہ داری ہے کہ وہ پریس کی آزادی کو برقرار رکھے اور ساتھ ہی نفرت انگیز تقریر اورانتہا پسندی کی صورتوں سے بچیں۔
انہوں نے کہا کہ میرے لئے یہ بات خاص طور پر باعث حیرانی ہے کہ صحافت کی آزادی کو خطرہ لاحق ہے، صحافیوں کو ان کا کام کرنے کی اجازت نہیں دی جا رہی ہے اور ساتھ ہی نفرت انگیز تقریر بھی پھیل رہی ہے۔
انہوں نے کہا جو کوئی بھی سماجی میڈیا کے پلیٹ فارم کا مالک ہے اسے اس بات کو یقینی بنانا چاہیے کہ آزادی اظہار بالخصوص صحافیوں کی عزت کا احترام کیا جائے ،اور ان سوشل پلیٹ فارمز کے ذریعے نفرت انگیز تقریر، نیو نازی ازم، سفید فام بالادستی اور انتہا پسندی کی دوسری صورتیں اپنا راستہ تلاش نہ کریں۔
