بیجنگ (شِنہوا)چینی وزیر اعظم لی کھ چھیانگ  نے کہا ہے کہ چین پرامن ترقی کے راستے اور اصلاحات اور کھلی معیشت کی ریاستی پالیسی پر قائم رہے گا۔

لی نے ان خیالات کا اظہار عظیم عوامی ہال میں چین میں تعینات ہونے والے41 نئے سفیروں اور ایک ادارے کے نمائندے سے ملاقات کے دوران کیا۔

انہوں نے چین میں  تعینات ہونے والے نئے سفیروں کا خیرمقدم کیا اور متعلقہ ممالک اور ادارے کے رہنماؤں کو مبارکباد اور نیک خواہشات کا اظہار کیا۔ انہوں نے کہا کہ چین تبادلوں کو مضبوط بنانے، باہمی اعتماد اور تعاون کو فروغ دینے اور متعلقہ فریقوں کے ساتھ ترقی کے حصول کے لیے کام کرنے کا خواہاں ہے ۔

وزیر اعظم نے کہا کہ چینی حکومت سفیروں کو اپنے ملک میں ان کے کام کے لیے سہولت اور تعاون فراہم کرے گی اور اس امید کا اظہار کیا کہ وہ اپنے ممالک اور چین کے درمیان دوستی اور تعاون کو مزید مضبوط بنانے  کے لیے کام کریں گے۔

لی نے کہا کہ چین پرامن ترقی کی راہ پر گامزن رہتے ہوئے اصلاحات اور کھلی معیشت کی بنیادی ریاستی پالیسی پر عمل پیرا رہے گا اور باہمی مفادپر مبنی تعاون کو مزید مستحکم کرنے کے لیے پرعزم رہے گا۔ انہوں نے کہا کہ قطع نظر اس کے کہ بین الاقوامی صورت حال کیا رخ اختیار کرتی ہے  ، چین اپنے دروازوں کو کھلا رکھے گا۔

اس موقع پر سفیروں نے عوامی جمہوریہ چین (پی آر سی) کی 73ویں سالگرہ پر چینی رہنماؤں اور عوام کو دلی مبارکباد دی۔