لاس اینجلس (شِنہوا) امریکہ میں 8 دسمبر کو ختم ہونے والے ہفتے کے دوران تقریباً 41 ہزار بچوں میں نوول کرونا وائرس کے کیسز رپورٹ ہوئے جو گزشتہ 8 ہفتے کے دوران ہفتہ وار اوسط کی نسبت 50 فیصد زائد ہے۔

امریکن اکیڈمی برائے امراض اطفال اور چلڈرن ہاسپیٹل ایسوسی ایشن کی تازہ ترین رپورٹ کے مطابق ملک میں وبا کے آغاز کے بعد سے تقریباً 1 کروڑ 51 لاکھ بچوں میں نوول کرونا وائرس کی تصدیق ہوچکی ہے۔ 

رپورٹ کے مطابق گزشتہ 4 ہفتے کے دوران اس میں 1 لاکھ 27 ہزار کیسز کا اضافہ ہوا ہے۔

رپورٹ میں یہ امکان بھی ظاہر کیا گیا ہے کہ بچوں میں نوول کرونا وائرس کے کم کیسز رپورٹ ہوئے ہیں۔

رپورٹ میں کہا گیا ہے کہ نئی اقسام سے متعلق بیماری کی شدت اور ممکنہ طویل مدتی اثرات کا جائزہ لینے کے لئے عمر کے اعتبار سے  زیادہ اعداد و شمار جمع کرنے کی ضرورت ہے۔

امریکن اکیڈمی برائے امراض اطفال نے کہا ہے کہ یہ تسلیم کرنا ضروری ہے کہ بچوں کی صحت پر وبائی امراض کے فوری اثرات ہوتے ہیں، تاہم اہم بات یہ ہے کہ بچوں اور نوجوانوں کی جسمانی ، ذہنی اور معاشرتی فلاح و بہبود پر دیرپا اثرات کی نشاندہی کرنے اور ان سے نمٹنے کی ضرورت ہے۔