وفاقی حکومت وفاقی ترقیاتی پروگرام پی ایس ڈی پی کے تحت جاری سوئی خصوصی ترقیاتی پیکج کو تکمیل کے آخری مرحلے میں لے آئی ہے۔ آٹھ میں سے چھ منصوبے مکمل ہو چکے ہیں جبکہ دو سڑکوں کے منصوبوں پر کام جاری ہے۔ سرکاری دستاویزات کے مطابق مالی سال 27-2026 کے لیے اس منصوبے کے لیے 25 کروڑ 67 لاکھ 57 ہزار روپے مختص کرنے کی تجویز دی گئی ہے۔ویلتھ پاکستان کو دستیاب دستاویزات کے مطابق اس پیکج کی مجموعی منظور شدہ لاگت 4 ارب 69 کروڑ 80 لاکھ روپے ہے جس میں سے 30 جون 2026 تک 3 ارب 85 کروڑ 20 لاکھ روپے جاری یا خرچ کیے جا چکے ہیں۔دستاویزات کے مطابق بجلی سے متعلق تین منصوبے 1 ارب 83 کروڑ روپے کی لاگت سے مکمل کیے گئے جبکہ ان پر 1 ارب 62 کروڑ 50 لاکھ روپے جاری یا خرچ کیے گئے۔سڑکوں کے شعبے میں مجموعی طور پر پانچ منصوبے شامل ہیں جن کی کل لاگت 2 ارب 86 کروڑ 80 لاکھ روپے ہے۔ ان میں سے تین منصوبے مکمل ہو چکے ہیں جن کی لاگت 1 ارب 22 کروڑ 90 لاکھ روپے جبکہ ان پر 1 ارب 15 کروڑ 10 لاکھ روپے خرچ کیے جا چکے ہیں۔باقی دو سڑکوں کے منصوبے زیرِ تکمیل ہیں جن کی مجموعی لاگت 1 ارب 63 کروڑ 90 لاکھ روپے ہے۔ دستاویزات کے مطابق 30 جون 2026 تک ان منصوبوں پر 1 ارب 8 کروڑ 20 لاکھ روپے جاری یا خرچ کیے جا چکے ہیں جبکہ مالی سال 27-2026 کے لیے مزید 25 کروڑ 67 لاکھ 57 ہزار روپے مختص کیے گئے ہیں۔

دستاویزات کے مطابق مکمل ہونے والے بجلی کے منصوبوں میں سوئی میں 132 کے وی گرڈ اسٹیشن اور کشمور سے سوئی تک 132 کے وی ٹرانسمیشن لائن، ڈیرہ بگٹی میں 132 کے وی گرڈ اسٹیشن اور سوئی سے ڈیرہ بگٹی تک 132 کے وی ٹرانسمیشن لائن اور ڈیرہ بگٹی کے دیہات کی بجلی فراہمی کے منصوبے شامل ہیں۔اسی طرح مکمل ہونے والے سڑکوں کے منصوبوں میں ڈولی چیک پوسٹ سے سغاری روڈ تک سڑک کی تعمیر و مرمت، ڈیرہ بگٹی سے پیرکوہ، حبیب راہی وڈیرہ اور کلی مراد تک سڑکوں کی بحالی، سوئی-ڈیرہ بگٹی روڈ کی بہتری اور ایک رابطہ سڑک کی تعمیر شامل ہے۔دستاویزات کے مطابق زیرِ تکمیل منصوبوں میں لہڑی سے سنگسِلہ روڈ پہلا مرحلہ کی پختہ سڑک کی تعمیر شامل ہے جس کی لاگت 84 کروڑ 10 لاکھ روپے ہے۔ اس منصوبے پر اب تک 53 کروڑ 50 لاکھ روپے خرچ کیے جا چکے ہیں جبکہ مالی سال 27-2026 کے لیے 15 کروڑ 60 لاکھ روپے مختص کیے گئے ہیں۔دوسرا زیرِ تکمیل منصوبہ سوئی سے اچ فیلڈ (57 کلومیٹر) تک پختہ سڑک کی تعمیر ہے جس کی لاگت 79 کروڑ 77 لاکھ 10 ہزار روپے ہے۔ اس منصوبے پر اب تک 54 کروڑ 69 لاکھ 53 ہزار روپے خرچ کیے جا چکے ہیں جبکہ آئندہ مالی سال کے لیے 10 کروڑ 7 لاکھ 57 ہزار روپے مختص کیے گئے ہیں۔

کریڈٹ: انڈیپنڈنٹ نیوز پاکستان-آئی این پی ویلتھ پاک