سرگودھا کے نجی ہسپتال میں ڈاکٹروں کی مبینہ غفلت اور غیر ذمہ داری کے باعث 25 سالہ خاتون پروین دورانِ آپریشن جاں بحق ہو گئی۔ ورثا نے بتایا ہے کہ پروین کو طبیعت خراب ہونے پر فوری طور پر سرگودھا کے ایک نجی ہسپتال لایا گیا جہاں لیڈی ڈاکٹر نے آپریشن تجویز کیا۔ورثا کا کہنا ہے کہ آپریشن کے دوران ہی خاتون دم توڑ گئی تاہم ڈاکٹروں نے موت کی اطلاع دینے کے بجائے مہنگے انجکشن تجویز کر کے لواحقین سے منگواتے رہے۔مریضہ کی موت کا علم ہونے پر جب ورثا نے احتجاج کیا تو ہسپتال کا سارا عملہ، بشمول ڈاکٹرز، ہسپتال سے غائب ہو گیا۔ متاثرہ خاندان نے واقعے کو سنگین غفلت اور دھوکا دہی قرار دیتے ہوئے اعلی حکام سے فوری نوٹس اور ذمہ داران کے خلاف کارروائی کا مطالبہ کیا ہے۔ پولیس یا محکمہ صحت کی جانب سے کوئی باضابطہ بیان سامنے نہیں آیا تاہم واقعے نے شہر بھر میں غم و غصے کی فضا پیدا کر دی ہے، اور شہری حلقے نجی ہسپتالوں کے غیر ذمہ دارانہ رویے پر سوال اٹھا رہے ہیں۔

کریڈٹ: انڈیپنڈنٹ نیوز پاکستان-آئی این پی