پنجاب حکومت کے محکمہ اسپیشلائزڈ ہیلتھ کیئر اینڈ میڈیکل ایجوکیشن نے مس کنڈکٹ پر 2 ڈاکٹرز کو نوکری معطل اور ایک برخاست کردیا اور سرکاری ہسپتالوں سے غیرحاضر ڈاکٹرز کی تنخواہیں فوری بندکرنیکا حکم دیتے ہوئے ڈاکٹرز، نرسز اور عملے کی چھٹیوں پر پابندی عائد کردی۔ تفصیل کے مطابق سروسز ہسپتال لاہور کے ڈاکٹر سلمان حسیب اور چلڈرن ہسپتال لاہور کے پی جی آر ڈاکٹر احمد یار کو معطل کردیا جبکہ جنرل ہسپتال لاہور کے ڈاکٹر محمد عامر بشیر کو نوکری سے برخاست کردیا گیا ہے۔ترجمان محکمہ سپیشلائزڈہیلتھ کیئر اینڈ میڈیکل ایجوکیشن کاکہنا تھاکہ بغیراطلاع غیر حاضر رہنے والے ڈاکٹر زکے واپس متعلقہ ہسپتال رپورٹ کرنے کے بعد تنخواہ بحال کی جائے گی۔اس حوالے سے تمام میڈیکل سپرنٹنڈنٹس کو ہدایات جاری کر دی گئی۔ ان کاکہنا تھاکہ محکمے نے ہسپتالوں سے بغیر اجازت غیر حاضر ہونے والے ڈاکٹرز کے خلاف تادیبی کارروائی شروع کر دی ہے، ان کاکہنا تھاکہ محکمہ اسپیشلائزڈ ہیلتھ کیئر اینڈ میڈیکل ایجوکیشن نے تمام ڈاکٹرز، نرسز اور الائیڈ ہیلتھ اسٹاف کی چھٹیوں پر بھی پابندی عائد کر دی ہے۔

کریڈٹ: انڈیپنڈنٹ نیوز پاکستان-آئی این پی