بھارت کی کرکٹ ٹیم کے مایہ ناز آل رائونڈر ہاردک پانڈیا نے کہا ہے کہ میزبان آئی لینڈرز ٹیم کو پہلے ٹی ٹونٹی میچ میں شکست دیکر سیریز کا آغاز فاتحانہ انداز میں کریں گے۔ انہوں نے کہا کہ ان کی ٹیم نے آئی لینڈرز کے خلاف ٹی ٹونٹی سیریز کے لئے بھرپور تیاری کر رہی ہے ، سری لنکن ٹیم کو اس کی سرزمین پر شکست دینا آسان نہیں ہے تاہم ان کی ٹیم سیریز کے ابتدائی میچ سے قبل بھرپور تیاریوں میں مصروف ہے، ان کی ٹیم میں ایسے کھلاڑی موجود ہیں جو کسی بھی وقت میچ کا پانسہ پلٹنے کی صلاحیت رکھتے ہیں۔ اپنے ایک بیان میں انہوں نے کہا کہ وہ آئی لینڈرز کے خلاف ابتدائی ٹی ٹونٹی میچ میں شاندار کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کریں گے۔ ہاردک پانڈیا نے کہا کہ وہ مکمل طور پر فٹ ہیں اور میزبان ٹیم کے خلاف 3ٹی ٹونٹی میچوں کی سیریز کے پہلے میچ میں شرکت کے لئے بے تاب ہیں، انہوں نے اپنی ٹیم کو خبردار کرتے ہوئے کہا کہ آئی لینڈرز کے خلاف سیریز میں کامیابی کے لئے ٹیم کو تینوں شعبوں میں سو فیصد کارکردگی کا مظاہرہ کرنا ہوگا۔واضح رہے کہ سری لنکا اور بھارت کے درمیان 3ٹی ٹونٹی بین الاقوامی میچوں پر مشتمل سیریز کا پہلا میچ 27جولائی کو پالے کیلی انٹرنیشنل کرکٹ سٹیڈیم پالے کیلی میں کھیلا جائے گا۔

کریڈٹ: انڈیپنڈنٹ نیوز پاکستان-آئی این پی