آئی سی سی ویمنز کرکٹ ورلڈ کپ کوالیفائیر کے لیے پاکستان میں موجود اسکاٹ لینڈ ویمن کرکٹ ٹیم میں پاکستان کے سابق ٹیسٹ کرکٹر مینجر اور سلیکٹر کرنل نوشاد کی نواسی مریم فیصل بھی شامل ہیں ، مریم فیصل کے جڑواں بھائی ابراہیم فیصل اسکاٹ لینڈ انڈر 19 کرکٹر ہیں ۔ مریم فیصل نے لاہور میں گفتگو کرتے ہو ئے کہا کہ اپنے نانا کی وجہ سے میں اور میرے جڑواں بھائی نے کرکٹ شروع کی نانا کو میں پیار سے بابا کہتی تھی ، انہوں نے مجھے بہت اسپورٹ کیا۔ انہوں نے کہا کہ بابا دبئی میں سری لنکا کے خلاف سیریز میں پاکستان ٹیم کے مینجر تھے ہم دیکھنے گئے تھے وہاں سے مجھے شوق ہوا ، ویسے تو مجھے کرکٹ بالکل پسند نہیں تھی ، میچ کے دوران میں سو گئی تھی مگر واپس آئے تو بھائی نے کلب جوائن کیا تو پھر میں نے بھی شروع کر دیا ۔

مریم فیصل نے بتایا کہ انڈر 19میں میں فلاپ ہو گئی تو بابا نے حوصلہ افزائی کی تو اگلا سیزن اچھا کھیلا ۔بابا نے مجھے ا ور میرے بھائی کو کبھی زبردستی کرکٹ کھیلنے کے لیے نہیں کہا تھا وہ چاہتے تھے کہ بس ہم کھیلوں میں آئیں۔ انہوں نے کہا کہ پاکستان آکر کھیلنا اچھا لگ رہا ہے ، یہ ایک مختلف احساس ہے کیونکہ جہاں سے آپ کاتعلق ہو وہاں کھیلنا ایک خواب ہوتا ہے تو میرا یہ خواب پورا ہو رہا ہے۔ مریم فیصل کہتی ہیں کہ دیسی لڑکیاں کھیل میں نہیں آتیں ، شائید فیملی کی وجہ سے یا ان کی خود دلچسپی نہیں ہوتی میرا خیال ہے کہ دیسی لڑکیوں کو یہ بتانا چاہیے کہ وہ کہیں بھی جا کر کچھ بھی کر سکتی ہیں۔ اپنی بات کو جاری رکھتے ہوئے انہوں نے بتایا کہ میں کھیل کے ساتھ ساتھ میڈیسن پڑھ رہی ہوں ، میرا ٹارگٹ اسکاٹ لینڈ ٹیم کا مستقل حصہ بننا ہے اور لیگز کھیلنا ہے ۔ واضح رہے کہ 19 سالہ مریم فیصل ایک ونڈے اور 6 ٹی ٹوئنٹی میچز میں سکاٹ لینڈ کی نمائندگی کر چکی ہیں ۔

کریڈٹ: انڈیپنڈنٹ نیوز پاکستان-آئی این پی