قومی ٹیم کے سابق سپیڈ سٹار شعیب اختر نے کہا ہے کہ شاہین آفریدی، حارث رف اور نسیم شاہ کے جوڑ نے پاکستانی ٹیم کو خطرناک بنادیا ہے اور یہ تینوں بے حد پراعتماد ہیں۔ شعیب اختر کا کہنا ہے کہ ان تینوں کی موجودگی دوسری ٹیموں کو بتاتی ہے کہ پاکستانی بالنگ کتنی خطرناک ہے، تینوں بالرز بااعتماد ہیں، وہ رنز سے خوف نہیں کھاتے وکٹ لے کر دکھاتے ہیں۔ شاہین، حارث اور نسیم کو وسیم اکرم اور وقار یونس جیسی بالنگ لائن اپ کہے جانے پر شعیب اختر نے اعتراف کیا کہ تینوں فاسٹ بالرز بے حد ٹیلنٹڈ ہیں۔ شعیب اختر نے پاکستان کی جانب سے دنیا کے بہترین فاسٹ بالر پیدا کرنے کی صلاحیت پر بے حد خوشی کا اظہار کرتے ہوئے کہا کہ پاکستان کے پاس اس وقت دنیا کے بہترین فاسٹ بالرز ہیں، شاہین اس وقت اپنے کیرئیر کے عروج پر ہیں، حارث بھی شاہین کے مائنڈ سیٹ یعنی وکٹ لینے کے انداز سے آگے بڑھ رہا ہے۔ سابق سپیڈ سٹار نے نسیم شاہ کو مشورہ دیتے ہوئے کہا کہ نسیم کو وکٹ لینے کے انداز سے بالنگ کرنی چاہیے، وہ سٹاک بالنگ کے بجائے وکٹ لینے کی کوشش کریں کیوں کہ ان کی بال شاہین سے زیادہ سوئنگ کرتی ہے۔ سابق کرکٹر کا کہنا تھا کہ ہمارے پاس ایک سپنر کی کمی ہے، شاداب اگرچہ بہترین بالر ہے لیکن اس کے ساتھ ساتھ بھی ٹیم میں ایک سپنر اور ہونا چاہیے، پاکستان کے پاس مڈل آرڈر کیلئے عبد الرزاق جیسے بالنگ آرڈر کی کمی ہے، ہمیں بھارت کیخلاف فہیم اشرف کو کھلانا چاہیے کیوں کہ ایسی صورت میں ہماری بالنگ مزید اچھی ہوتی ہے۔

کریڈٹ: انڈیپنڈنٹ نیوز پاکستان-آئی این پی