روبرٹ شانگرا نے نیشنل ٹین پن بالنگ چیمپئن شپ کا مینز سنگلز کا ٹائٹل جیت لیا جبکہ علی سلڈیرا اور فاضل مانیا بالترتیب دوسرے اور تیسرے نمبر پر رہے۔ چیمپئن شپ کی اختتامی تقریب کی مہمان خصوصی رکن قومی اسمبلی ڈاکٹر ثمینہ مطلوب تھیں جنہوں نے کامیابی حاصل کرنے والے کھلاڑیوں میں انعامات تقسیم کئے۔ اس موقع پر پاکستان ٹین پن بائولنگ فیڈریشن کے صدر اعجاز الرحمان اور سیکرٹری جنرل محمد حسین چٹھہ کے علاوہ شائقین کی کثیر تعداد بھی موجود تھی۔چیمپئن شپ میں دس لاکھ کی انعامی رقم رکھی گئی تھی۔ گزشتہ روز لیزر سٹی بالنگ کلب جناح پارک راولپنڈی میں کھیلے گئے مینز سنگلز کے مقابلے میں روبرٹ شانگرا نے پہلی اور علی سلڈیرا نے دوسری پوزیشن حاصل کی جبکہ فاضل مانیا اور سجاد شاہ بالترتیب تیسرے اور چوتھے نمبر پر رہے۔ چیمپئن شپ میں ملک بھر سے مرد اور خواتین کھلاڑیوں نے حصہ لیا اور چیمپین شپ میں مختلف نو کیٹگریز کے ایونٹس منعقد ہوئے جن میں مینز سنگلز، مینزڈبلز، ماسٹر، ایمچور، لیڈیز سنگلز، ٹیم ایونٹ، مینز ڈیف، ویمن ڈیف اور انٹر سکولز شامل تھے۔

کریڈٹ: انڈیپنڈنٹ نیوز پاکستان-آئی این پی