پشاور میں تقریبا بیس سال بعد ارباب نیاز کرکٹ اسٹیڈیم میں میچز کروانے کے امکانات پر غور کیا جارہا ہے۔پاکستان کرکٹ بورڈ (پی سی بی) کی جانب سے اپریل میں پاکستان سپر لیگ (پی ایس ایل) کے دو میچز پشاور میں کروانے پر غور کیا جا رہا ہے۔ اس سلسلے میں انٹرنیشنل کرکٹ کونسل (آئی سی سی) کے نمائندے نے اسٹیڈیم کا دورہ کیا، جہاں پولیس حکام نے انہیں سیکیورٹی صورتحال پر بریفنگ دی۔پولیس حکام کے مطابق، غیر ملکی کھلاڑیوں کے لیے گرائونڈ، پولین ایریا، ہوٹل روٹ اور اسٹیڈیم کے اطراف سیکیورٹی انتظامات کا جائزہ لیا گیا۔ عوام کی سہولت کے لیے شٹل سروس، ڈرون کیمروں سے مانیٹرنگ اور اسٹیڈیم کے قریب ہیلی پیڈ بنانے کی تجویز بھی زیر غور ہے۔پولیس حکام نے یقین دہانی کرائی ہے کہ غیر ملکی کھلاڑیوں کے لیے سیکیورٹی کے تسلی بخش انتظامات کیے جائیں گے۔یاد رہے کہ ارباب نیاز اسٹیڈیم میں آخری بین الاقوامی میچ 2006 میں پاکستان اور بھارت کے درمیان کھیلا گیا تھا۔

کریڈٹ: انڈیپنڈنٹ نیوز پاکستان-آئی این پی