پاکستان کرکٹ ٹیم کے بالنگ کوچ عمر گل نے کہا ہے کہ نئی گیند کے ساتھ اچھی بالنگ نہیں ہو رہی، فاسٹ بالرز کی رفتار میں کمی نظر آ رہی ہے، بالنگ یونٹ نے 10 وکٹیں لیں جس سے ان کی کاکردگی کا اندازہ لگایا جا سکتا ہے۔ پرتھ ٹیسٹ کے دوسرے روز کا کھیل ختم ہونے کے بعد پریس کانفرنس کرتے ہوئے عمر گل نے کہا ہے کہ آسٹریلیا کیخلاف پرتھ میں پہلے ٹیسٹ میچ میں 4 فاسٹ بالرز کو کھلانے کا فیصلہ درست ثابت ہوا، دونوں نوجوان فاسٹ بالرز نے فائٹ بیک کر کے اچھی باولنگ کی۔ انہوں نے مزید کہا ہے کہ اپنے کیریئر کے پہلے ٹیسٹ میں بالنگ کرنا مشکل ہوتا ہے، خاص طور پر آسٹریلیا میں آسٹریلیا کیخلاف بالنگ آسان نہیں ہوتی، فاسٹ بالرز کی کارکردگی سے مطمئن ہوں، عامر جمال اور خرم شہزاد فرسٹ کلاس سیزن میں بالنگ کرتے آ رہے ہیں۔ باولنگ کوچ نے کہا ہے کہ شاہین شاہ آفریدی ہمارے مین بالر ہیں، وائٹ بال سے ریڈ بال میں آکر بالنگ کرنا آسان نہیں ہوتا، انہوں نے لمبے عرصے سے ٹیسٹ نہیں کھیلے، ردھم میں آنے میں وقت لگے گا، امید ہے وہ دوسری اننگز میں اچھے ردھم کے ساتھ بالنگ کریں گے۔

کریڈٹ: انڈیپنڈنٹ نیوز پاکستان-آئی این پی