قومی ٹیم کے سابق ڈائریکٹر و کپتان محمد حفیظ نے کہا ہے کہ پاکستانی ٹیم ہوم کنڈیشنز کا فائدہ اٹھانا بھول چکی ہے اور جیتنے کا فارمولہ بھی کھوچکے ہیں۔ ایک انٹرویو دیتے ہوئے سابق آل رائونڈر بنگلادیش کیخلاف سیریز میں قومی ٹیم کی کارکردگی پر سوال اٹھاتے ہوئے کہا کہ بدقسمتی سے پاکستان ہوم کنڈیشنز کا فائدہ اٹھانا بھول چکا ہے کیونکہ طویل عرصے تک ہم نے یو اے ای کو بطور ہوم گرائونڈ استعمال کیا۔انہوں نے کہا کہ متحدہ عرب امارات طویل عرصے تک ہمارا ہوم گرائونڈ بن چکا تھا تو ٹیسٹ سیریز جیتیں اور ٹاپ رینک حاصل کیا لیکن جب سے ٹیسٹ کرکٹ پاکستان واپس آئی ہے ہم ایسا کرنے میں کامیاب نہیں ہوسکے۔ سابق کپتان نے کہا کہ آسٹریلیا، انگلینڈ اور بھارت جیسے ممالک نے اپنی ہوم کنڈیشنز کا فائدہ اٹھاتے ہیں کیونکہ وہ ہوم گرانڈز پر ہی کھیلتے آرہے ہیں لیکن بدقسمتی سے پاکستان کیساتھ ایسا نہیں۔ خیال رہے کہ پاکستان 7 اکتوبر سے ملتان میں شروع ہونے والی تین میچوں کی ٹیسٹ سیریز کے لیے انگلینڈ کی میزبانی کرے گا، پہلے دو مسلسل ٹیسٹ میچز ملتان میں ہوں گے جبکہ تیسرا میچ راولپنڈی میں شیڈول ہے۔

کریڈٹ: انڈیپنڈنٹ نیوز پاکستان-آئی این پی