امریکا کی مقبول کرکٹ فرنچائز نائٹ رائڈر کے مالک پاکستانی بزنس مین ماجد رضوی اپنی ٹیم کو پی ایس ایل نائن میں شامل کرانے کے خواہش مند ہیں۔ نجی ٹی وی سے خصوصی گفتگو میں ماجد رضوی نے کہا کہ وہ خود کرکٹر رہے ہیں، لاہور میں کئی کلب کی نمائندگی کرچکے ہیں اور امریکا آنے کے بعد یو ایس کرکٹ ٹیم کا حصہ بھی رہے۔ انہوں نے کہا کہ یو ایم ایم سی نائٹ رائڈر ٹیم ہیوسٹن اوپن 2022 کی چیمپئن ٹیم ہے جس میں پاکستانی اسٹارز کھلاڑی بھی کھیل چکے ہیں، ٹیسٹ کرکٹر سہیل تنویر سمیت کئی پاکستانی کھلاڑی بھی اس کا حصہ رہ چکے ہیں۔ ماجد رضوی کا کہنا تھا کہ سابق کپتان سرفراز احمد سے بھی بات چیت کا سلسلہ جاری ہے جب کہ عثمان شنواری، عمران جونئیر اور نعمان انور ٹیم کا حصہ ہیں، وہ اپنی ٹیم نائٹ رائڈر کو پی ایس ایل ٹیم کا حصہ بنانا چاہتے ہیں، ماضی میں ان کی پی سی بی کے کئی عہدیداروں سے بات چیت بھی ہوچکی ہے مگر بورڈ کی تبدیلی سے معاملات طے نہیں ہو پائے تھے۔ انہوں نے مزید کہا کہ وہ پی ایس ایل میں بابر اعظم اور محمد رضوان کو اپنی ٹیم نائٹ رائڈر کا حصہ بنانا چاہتے ہیں، اس کے علاوہ اگر بابر اور رضوان امریکی لیگ کھیلنا چاہیں تو نائٹ رائڈر ٹیم کو اپنا گھر سمجھیں۔

کریڈٹ: انڈیپنڈنٹ نیوز پاکستان-آئی این پی