پاکستان شاہینز نے اپنے بولرز کی عمدہ کارکردگی کی بدولت ڈارون ٹور کے دوسرے ون ڈے میچ میں بنگلہ دیش اے کو 8وکٹوں سے شکست دے دی۔اس سے قبل اس نے اتوار کے روز اپنے پہلے ون ڈے میں این ٹی اسٹرائیک کو چار وکٹوں سے ہرایا تھا۔منگل کو کھیلے گئے میچ میں محمد حارث نے ٹاس جیت کر بنگلہ دیش اے کو بیٹنگ دی ۔ پاکستان شاہینز کے بولرز نے بنگلہ دیش اے کو 24.3اوورز میں صرف78رنز پر آئوٹ کردیا۔پاکستان شاہینز نے 79رنز کا ہدف 17اوورز میں 2وکٹوں کے نقصان پر حاصل کرلیا۔پاکستانی بولرز کی عمدہ بولنگ نے بنگلہ دیش اے کو کسی بھی موقع پر سنبھلنے کا موقع نہیں دیا اور اس کی وکٹیں وقفے وقفے سے گرتی رہیں۔ پرویز حسین 19رنز کے ساتھ ٹاپ اسکورر رہے۔ عمران جونیئر تین وکٹوں کے ساتھ سب سے کامیاب بولر رہے۔این ٹی اسٹرائیک کے خلاف عمدہ بولنگ کرنے والے جہانداد خان اور مبصر خان نے ایک پھر اچھی بولنگ کرتے ہوئے دو دووکٹیں حاصل کیں۔ خرم شہزاد بھی دو کھلاڑی آئوٹ کرنے میں کامیاب رہے۔ انہیں ون ڈے میچوں کے لیے ڈارون میں روک لیا گیا تھا ۔کپتان محمد حارث نے وکٹ کیپنگ میں تین کیچز کیے۔پاکستان شاہینز کی اننگز میں صاحبزادہ فرحان بغیر کوئی رن بنائے رپون مونڈل کی گیند پر آئوٹ ہوگئے جس کے بعد عبدالفصیح اور عثمان خان نیدوسری وکٹ کے لیے 48 رنز کا اضافہ کیا۔عبدالفصیح 12 رنز بناکر مونڈل کی گیند پر آئوٹ ہوئے۔عثمان خان نے پانچ چوکوں اور ایک چھکے کی مدد سے 39رنز اسکور کیے اور آئوٹ نہیں ہوئے۔طیب طاہر17رنز بناکر ناٹ آئوٹ رہے۔

کریڈٹ: انڈیپنڈنٹ نیوز پاکستان-آئی این پی