پاکستان اور انگلینڈ کے درمیان ملتان ٹیسٹ کے آغاز سے قبل سیکیورٹی پلان تیار کرلیا گیا،ملتان کرکٹ اسٹیڈیم میں 7اکتوبر سے شروع ہونے والے پہلے ٹیسٹ میچ کیلئے شائقین کو سہولیات فراہم کرنے اور مہمان ٹیم کی سیکیورٹی کیلئے سخت اقدامات اٹھائے گئے ہیں،نجی ٹی وی کے مطابق چیف پولیس آفیسر (سی پی او)صادق ڈوگر کا کہنا ہے کہ ملتان ٹیسٹ کیلئے ٹریفک پولیس، ایلیٹ فورس اور دیگر سیکیورٹی اداروں کے تعاون کے ساتھ 5ہزار سے زائد پولیس افسران اور اہلکار تعینات کیے جائیں گے تاکہ امن و امان کو برقرار رکھا جاسکے،سی پی او ڈوگر نے یہ بھی انکشاف کیا کہ حفاظتی پروٹوکول کو مزید بڑھانے کیلئے اسٹیڈیم کے گرد اہم علاقوں میں سرچ آپریشن بھی کیا جارہا ہے،میچ میں شرکت کرنے والے شائقین کیلئے فاطمہ جناح ٹائون میں پارکنگ دستیاب ہوگی جہاں سے شٹل سروس کے ذریعے فینز کو اسٹیڈیم تک پہنچایا جائے گا،پاکستان اور انگلینڈ کے درمیان پہلا ٹیسٹ 7اکتوبر کو کھیلا جائے گا، دوسرا ٹیسٹ 15اکتوبر ملتان کرکٹ اسٹیڈیم جبکہ سیریز کا آخری میچ 24اکتوبر کو راولپنڈی کرکٹ اسٹیڈیم میں شیڈول ہے۔

کریڈٹ: انڈیپنڈنٹ نیوز پاکستان-آئی این پی