چیئرمین پی سی بی محسن نقوی نے کہا ہے کہ میری ٹیم ملتان سلطانز کی فروخت کیلئے مجھ پر دبائو ڈال رہی ہے۔اسلام آباد کے جناح کنونشن سینٹر میں پی ایس ایل کی دو نئی ٹیموں کی نیلامی کے بعد میڈیا سے گفتگو میں چیئرمین پی سی بی نے ملتان سلطانز کے سابقہ مالک کا نام لیے بغیر کہا کہ سوشل میڈیا پر تنقید ہورہی تھی کہ ٹیم خسارے میں ہے تو ہم نے فیصلہ کیا ہے کہ پہلے سب کو دکھائیں گے کہ کتنا منافع ہے پھر اس کے بعد ٹیم نیلام کریں گے۔انہوں نے مسکراتے ہوئے کہا کہ مجھ پر گزشتہ آدھے گھنٹے میں دبا ئو بڑھنا شروع ہوگیا ہے کہ ملتان سلطانز کو بھی بیچ دیں ۔چیئرمین پی سی بی نے کہا کہ میری خواہش ہے کہ ہم ایک سال ملتان سلطانز کے معاملات چلائیں اور اسے منافع میں چھوڑیں لیکن حتمی فیصلہ پوری ٹیم نے کرنا ہے۔ پی ایس ایل کے سی ای او سلمان نصیر نے سوال کے جواب میں کہا کہ محسن نقوی پہلے ہی بتاچکے ہیں کہ پی ایس ایل کے گیارہویں ایڈیشن میں ملتان سلطانز کے معاملات پی سی بی خود دیکھے گا۔ سلمان نصیر نے کہا کہ میں ابھی اور دبا ئوڈالوں گا۔

کریڈٹ: انڈیپنڈنٹ نیوز پاکستان-آئی این پی