وسطی میکسیکو میں ایک فٹبال گرانڈ پر مسلح حملہ آوروں کی فائرنگ کے نتیجے میں کم از کم 11 افراد ہلاک اور 12 زخمی ہو گئے۔ مقامی حکام کے مطابق فائرنگ کا یہ واقعہ ریاست گواناخواتو کے تشدد سے متاثرہ شہر سلامانکا کے علاقے لوما دے فلوریس میں ایک مقامی فٹبال میچ کے اختتام کے فورا بعد پیش آیا۔ بلدیاتی اور ریاستی حکام کے مطابق، میچ ختم ہونے کے بعد جب لوگ میدان میں جمع تھے، اسی دوران مسلح افراد نے حملہ کر دیا۔ سلامانکا کے میئر سیزر پریئتو نے بتایا کہ ایک مسلح گروہ میدان میں داخل ہوا اور لوگوں پر بلاامتیاز فائرنگ شروع کر دی، جس سے موقع پر ہی 10 افراد ہلاک جبکہ ایک زخمی بعد میں ہسپتال میں دم توڑ گیا۔

ایک بیان میں میئر نے کہا کہ شہر میں مجرمانہ تشدد میں خطرناک حد تک اضافہ ہو رہا ہے اور منظم جرائم پیشہ گروہ ریاستی رٹ کو کمزور کرنے کی کوشش کر رہے ہیں۔ صورتحال کو سنگین قرار دیتے ہوئے میئر سیزر پریئتو نے میکسیکو کی صدر کلاڈیا شین بام اور ریاستی حکام سے اضافی سیکیورٹی مدد کی براہِ راست اپیل کی۔ ہم اس وقت ایک نہایت سنجیدہ مرحلے سے گزر رہے ہیں، ایک سماجی بحران کا سامنا ہے، مجرمانہ گروہ ریاستی اختیار کو دبانے کی کوشش کر رہے ہیں، لیکن وہ کامیاب نہیں ہوں گے۔ ریاست گواناخواتو کے پروسیکیوٹر آفس نے واقعے کی باقاعدہ تحقیقات شروع کر دی ہیں اور علاقے میں سیکیورٹی مضبوط بنانے کے لیے وفاقی حکام کے ساتھ رابطے میں ہے۔ شہر میں امن و امان کی بحالی کے لیے ریاستی اور وفاقی فورسز تعینات کر دی گئی ہیں۔

کریڈٹ: انڈیپنڈنٹ نیوز پاکستان-آئی این پی