چئیرمین پاکستان کرکٹ بورڈ محسن نقوی نے پاکستان کی وہیل چیئرکرکٹ ٹیم کے کھلاڑیوں کو ایشین چیمپئن شپ جیتنے پر مبارکباد اور 15 لاکھ روپے کا چیک دیا۔ تفصیلات کے مطابق چئیرمین پاکستان کرکٹ بورڈ محسن نقوی کی خصوصی دعوت پر وہیل چیئرکرکٹ ٹیم کے کھلاڑیوں نے قذافی سٹیڈیم میں چئیرمین پی سی بی محسن نقوی سے ملاقات کی ۔چئیرمین پی سی بی محسن نقوی سے ملاقات کرنے والوں میں وہیل چیئر کرکٹ کونسل کی چیئرپرسن رخسانہ راجپوت۔ وہیل چیئر کرکٹ ٹیم کے کپتان محمد ذیشان۔ نائب کپتان عمران ارائیں ۔ بیٹسمین سید ارسلان احمد۔ وکٹ کیپر بیٹر معظم نواز اور دنیا کے تیز ترین باولر محمد فیاض شامل تھے ۔ اس موقع پر چئیرمین پی سی بی محسن نقوی نے کھلاڑیوں کو ایشین چیمپئن شپ جیتنے پر مبارکباد دی اور کارکردگی کو سراہا تے ہوئے کھلاڑیوں کی بھرپور حوصلہ افزائی کی اور 15 لاکھ روپے کا چیک دیا ، وہیل چیئر کرکٹ ٹیم کے لئے نیک خواہشات کا اظہار کیا ۔ محسن نقوی نے کہا وہیل چیئر کرکٹ ٹیم کی کامیابیوں پر دلی خوشی ہوئی ہے،پی سی بی وہیل چیئرکرکٹ ٹیم کی سپورٹ جاری رکھے گا ،امید ہے کہ وہیل چیئرکرکٹ ٹیم آئندہ بھی ٹورنامنٹس جیت کر پاکستان کا نام روشن کرے گی۔ وہیل چیئرکرکٹ ٹیم کے کھلاڑیوں نے قذافی سٹیڈیم بلا کر حوصلہ افزائی کرنے پر چئیرمین پی سی بی محسن نقوی کا شکریہ ادا کیا اور چیئر مین پی سی بی سے گفتگو میں کہا کہ آپ نام کے ساتھ کرکٹ کے بھی محسن ہیں۔ چیف آپریٹنگ آفیسر پی سی بی سلمان نصیر۔ ڈائریکٹر ڈومیسٹک کرکٹ عبداللہ خرم نیازی۔ سینیر جنرل مینجر ڈومیسٹک کرکٹ جیند ضیا اور متعلقہ حکام بھی اس موقع پر موجود تھے ۔واضح رہے کہ پاکستانی وہیل چیئر کرکٹ ٹیم نے نیپال میں ہونے والے فائنل میں سری لنکا کو ہرا کر ایشین چیمپئن شپ جیتی تھی-

کریڈٹ: انڈیپنڈنٹ نیوز پاکستان-آئی این پی