سابق کپتان محمد حفیظ نے چیمپئنز ٹرافی میں خراب کارکردگی کے بعد قومی ٹیم کے تینوں فاسٹ بولرز شاہین آفریدی، نسیم شاہ اور حارث رئوف کو تنقید کا نشانہ بناتے ہوئے کہا ہے کہ تینوں نے 2023 کے ایشیا کپ کے بعد سے مسلسل ناقص کارکردگی کا مظاہرہ کیا ۔ ایک ٹی وی پروگرام میں گفتگو کرتے ہوئے محمد حفیظ نے کہا کہ اب یہ تسلیم کرنے کا وقت ہے کہ ٹیلنٹ کے باوجود ان تینوں نے خود کو پاکستان کے لیے بڑا ٹورنامنٹ نہیں جتوایا، اب وقت ہے کہ ہم آگے بڑھیں اور دوسرے بولرز جیسے محمد علی، خرم شہزاد، محمد وسیم جونیئر، عاکف جاوید اور میر حمزہ کو موقع دیں۔ حفیظ کا کہنا تھا کہ یہ کھلاڑی اپنے مواقع کا انتظار کررہے ہیں، وہ بھی پاکستانی ہیں اور وہ ایک موقع کے مستحق ہیں، ان کے پاس بھی پاکستانی پاسپورٹ ہے۔ دوسری جانب بابراعظم سے متعلق بات کرتے ہوئے سابق کپتان نے کہا کہ بابر گزشتہ 10 سالوں سے پاکستان کے لیے کھیل رہے ہیں لیکن وہ پاکستان کو بھارت کے خلاف ایک بھی فتح دلانے میں مدد نہیں کر سکے۔ ان کا کہنا تھا کہ بابر کو اب نمبر تین پر مستقل کھلانا چاہیے تاکہ ٹیم کا مڈل آرڈر مضبوط ہو، رضوان، بابر اور سلمان علی آغا مل کے اچھا مڈل آرڈر بن سکتے ہیں۔

کریڈٹ: انڈیپنڈنٹ نیوز پاکستان-آئی این پی