اداکار اور ماڈل عماد عرفانی بھی اداکارہ ماہرہ خان کی صلاحیتوں کے گن گانے لگے۔ عماد عرفانی نے حال ہی میں نجی ٹیلی ویژن کے پروگرام میں بطور مہمان شرکت کی جہاں انہوں نے کئی اہم پہلو کو اپنی گفتگو میں شامل کیا۔دوران انٹرویو انڈسٹری میں اپنے سب سے پسندیدہ اداکار کے بارے بات کرتے ہوئے سینئر فنکاروں میں سے اداکار فردوس جمال، راحت کاظمی اور محمد قوی خان کی تعریف کردی۔عماد نے بتایا کہ یہ وہ شخصیات ہیں جن سے میں نے بہت کچھ سیکھا ، جبکہ نئے دور کے اداکاروں میں عماد عرفانی اداکار فہد مصطفی اور فواد خان سے متاثر نظر آئے۔عماد عرفانی کا کہنا تھا کہ فہد اور فواد جیسے اداکار اس وقت سے انڈسٹری کی خدمت کر رہے ہیں جب انڈسٹری جہدو جہد میں مصروف تھی ۔ عماد عرفانی نے خواتین اسٹارز کی تعریف کیلئے ماہرہ خان کو منتخب کیا اور انہیں سپر اسٹار قرار دیتے ہوئے بتایا کہ ماہرہ خان کے ساتھ میں نے بے شمار کمرشلز کیے ہوئے ہیں اور میں یقینی طور پر کہ سکتا ہوں کہ وہ ایک سپر اسٹار ہیں کیونکہ یہ وہ اداکارہ ہیں جن سے سب کو یہ سیکھنے کی ضرورت ہے کہ لوگوں کیساتھ کس طرح پیش آنا ہے۔

کریڈٹ: انڈیپنڈنٹ نیوز پاکستان-آئی این پی