آئندہ سال فروری میں پاکستان میں منعقد ہ سہ فریقی ون ڈے انٹرنیشنل سیریز کے فائنل سمیت دو میچز کراچی منتقل کردئیے گئے ۔چیمپئنز ٹرافی سے قبل پاکستان، نیوزی لینڈ اور جنوبی افریقا کے درمیان 8 سے 14 فروری تک وارم اپ مقابلوں کی حیثیت کی حامل سیریز کا ملتان کرکٹ اسٹیڈیم میں انعقاد طے تھا۔ ذرائع کے مطابق 12 فروری کو پاکستان اور جنوبی افریقا کے درمیان ہونے والا سیریز کا تیسرا میچ کراچی کے نیشنل بنک اسٹیڈیم میں کھیلا جائے گا جبکہ 14 فروری کو ہونے والے فائنل کی میزبانی بھی کراچی کو سونپ دی گئی ہے۔ پروگرام کے تحت سیریز کا پہلا میچ 8 فروری کو پاکستان اور نیوزی لینڈ کے درمیان اور دوسرا میچ 10 فروری کو نیوزی لینڈ اور جنوبی افریقہ کے درمیان ملتان کرکٹ اسٹیڈیم میں ہی کھیلا جائے گا۔واضح رہے کہ پاکستان کی میزبانی میں ہونے والی چیمپئنز ٹرافی کے مجوزہ شیڈول میں افتتاحی تقریب کے ساتھ پاکستان اور نیوزی لینڈ کے درمیان افتتاحی میچ بھی کراچی میں 19 فروری کو طے ہے۔ ذرائع کا کہنا ہے کہ سیریز کے فائنل سمیت دو میچز کی کراچی منتقلی کے حوالے سے آئی سی سی سے منظوری حاصل کرلی گئی ہے جبکہ فریقین کو بھی اس ضمن میں اعتماد میں لیاگیا ہے۔

کریڈٹ : انڈیپنڈنٹ نیوز پاکستان-آئی این پی