انٹرنیشنل کرکٹ کونسل کے زیر اہتمام ویسٹ انڈیز اور امریکا میں جاری نویں آئی سی سی مینز ٹی 20ورلڈ کپ کے دونوں سیمی فائنل جمعرات کے روز(آج)کھیلے جائیں گے۔میگا ایونٹ کی سیمی فائنل لائن اپ مکمل ہوگئی ہے اور جنوبی افریقا ،افغانستان، دفاعی چیمپئن انگلینڈ اور بھارت کی ٹیمیں سیمی فائنل میں پہنچ چکی ہیں۔ ٹورنامنٹ کا پہلا سیمی فائنل میچ جنوبی افریقا اور افغانستان کی ٹیموں کے درمیان آج جمعرات کو برائن لارا سٹیڈیم، تاروبا، ٹرینیڈاڈ میں کھیلا جائے گا ۔میچ کا ٹاس پاکستان کے معیاری وقت کے مطابق صبح 5بج کر 30منٹ پر ہوگا۔ جنوبی افریقا کی ٹیم کو مایہ ناز بلے باز ایڈن مارکرم لیڈ کر رہے ہیں اور افغانستان کی ٹیم کی قیادت مایہ ناز آل رائونڈر راشد خان کر رہے ہیں۔میگا ایونٹ کا اسی روز دوسرا سیمی فائنل میچ دفاعی چیمپئن انگلینڈ اور بھارت کی ٹیموں کے درمیان پراویڈنس سٹیڈیم، گیانا میں کھیلا جائے گا۔

کریڈٹ: انڈیپنڈنٹ نیوز پاکستان-آئی این پی