معروف ٹی وی میزبان و اداکارہ نادیہ خان نے مقبول اداکارہ حبا بخاری کے حمل کی خبر بریک کرنے پر وضاحتی بیان جاری کردیا۔گزشتہ دنوں نادیہ خان نے ایک ٹی وی شو کے دوران انکشاف کیا تھا کہ حبا بخاری اور ان کے شوہر و اداکار آریز احمد بہت جلد والدین بننے والے ہیں۔حبا بخاری اور آریز احمد نے حمل کی خبر کو سوشل میڈیا کی دنیا سے خفیہ رکھا تھا اور جب نادیہ خان نے جوڑے کی نجی خبر کو ٹی وی چینل پر بریک کیا تو سوشل میڈیا صارفین نے نادیہ خان پر کڑی تنقید کی۔صارفین کا کہنا تھا کہ اگر حبا بخاری اور آریز احمد اپنی نجی زندگی کے معاملات میڈیا سے دور رکھنا چاہتے ہیں تو آپ کیوں ان کی نجی باتیں ٹی وی پر بیٹھ کر کررہی ہیں۔حمل کی خبر پر جہاں حبا بخاری اور آریز احمد تاحال خاموش ہیں تو وہیں نادیہ خان نے ان پر تنقید کرنے والوں کو کرارا جواب دے دیا ہے۔نادیہ خان نے اپنے وضاحتی بیان میں کہا کہ میں آریز احمد کے ساتھ ڈرامے میں کام کررہی ہوں تو شوٹنگ کے دوران سیٹ پر آریز نے مجھے حبا کے حمل کی خوشخبری سنائی۔نادیہ خان نے کہا کہ لوگ مجھے خود کہہ دیتے ہیں کہ آپ ہماری یہ بات کسی کو نہیں بتانا تو پھر میں کسی کے آگے اس بات کا ذکر تک نہیں کرتی لیکن آریز نے مجھے ایسا کچھ بھی نہیں کہا تھا۔

کریڈٹ: انڈیپنڈنٹ نیوز پاکستان-آئی این پی