نیوزی لینڈ نے دورہ پاکستان کے 5 ٹی ٹونٹی میچز کیلئے 15 رکنی اسکواڈ کا اعلان کردیا، مائیکل بریسویل ٹیم کی قیادت کریں گے۔ اہم کھلاڑیوں کی عدم موجودگی کے باعث مائیکل بریسویل کو پہلی بار کیوی ٹیم کاکپتان مقرر کیا گیا۔دورہ پاکستان کے لیے بریسویل کے علاوہ فن ایلن،مارک چیپمین اور جوش کلارکسن اسکواڈ میں شامل ہیں، جمی نیشم، ٹم سائفرٹ اور اش سودھی بھی کیوی ٹیم کا حصہ ہوں گے۔ نیوزی لینڈ کے 9 کھلاڑی آئی پی ایل اور ایک کاونٹی کی وجہ سے دستیاب نہیں ہے۔ ٹرینٹ بولٹ، ڈیون کانوے،لوکی فرگوسن،میٹ ہینری اور ڈیرل مچل آئی پی ایل میں مصروف ہیں۔ نیوزی لینڈ کرکٹ کیمطابق گلین فلپس، رچن روندرا، کین ولیمسن اور مچل سینٹنر بھی آئی پی ایل کھیل رہے ہیں،ول ینگ کاونٹی جبکہ ٹام لیتھم گھریلوں مصروفیات کی وجہ سیدستیاب نہیں ہیں، ٹم ساوتھی کو ورک لوڈ مینجمنٹ کے تحت دورہ پاکستان کے لیے آرام دیا گیا ہے۔ پاکستان اور نیوزی لینڈ کے درمیان پانچ ٹی ٹوئنٹی میچز کی سیریز 18 اپریل سے شروع ہوگی، نیوزی لینڈ کرکٹ ٹیم 12 اپریل کو پاکستان کے لیے روانہ ہوگی۔

کریڈٹ: انڈیپنڈنٹ نیوز پاکستان-آئی این پی