سابق آسٹریلوی کرکٹر رکی پونٹنگ کے بعد بھارت کے سابق کرکٹر اور معروف کمنٹیٹر روی شاستری نے بھی آئی سی سی چیمپئنز ٹرافی کافائنل آسٹریلیا اور بھارت کے مابین کھیلے جانے سے متعلق پیشگوئی کی ہے۔روی شاستری نے آئی سی سی ریویو میں اظہار خیال کرتے ہوئے کہا کہ بھارت اور آسٹریلیا وہ دو ٹیمیں ہیں جو چیمپئنز ٹرافی 2025 کا فائنل کھیل سکتی ہیں۔انہوں نے مختصرا گفتگو میں کہا کہ بھارت اور آسٹریلیا میگا ٹورنامنٹس میں ہمیشہ ہی بہت شاندار کارکردگی کا مظاہرہ کرتے ہیں، تاریخ دیکھی جائے تو یہ دونوں فائنل کے لیے کوالیفائی کرسکتے ہیں۔ شاستری نے کھلاڑیوں کے معیار کا بھی ذکر کیا جو اس وقت دونوں ٹیموں کے پاس ہیں۔اس کے علاوہ 62 سالہ سابق کرکٹر نے جنوبی افریقا اور انگلینڈ سے متعلق کہا کہ یہ دونوں وہ ٹیمیں ہوسکتی ہیں جو سیمی فائنل کھیلیں گی۔واضح رہے کہ اس سے قبل سابق آسٹریلوی کپتان رکی پونٹنگ نے بھی آسٹریلیا اور بھارت کے درمیان آئی سی سی چیمپئنز ٹرافی کا فائنل میچ ہونے کی پیشگوئی کی تھی لیکن ساتھ انہوں نے یہ بھی خبردار کیا تھا کہ پاکستانی ٹیم دونوں ٹیموں کے لیے چیلنج بنے گی۔ واضح رہے کہ ٹورنامنٹ کا آغاز 19 فروری سے پاکستان اور یو اے ای میں ہونے جارہا ہے جس میں آٹھ ٹیمیں ایک دوسرے کے مد مقابل ہوں گی۔

کریڈٹ: انڈیپنڈنٹ نیوز پاکستان-آئی این پی