انٹرنیشنل کرکٹ کونسل(آئی سی سی)کا وفد چیمپئنز ٹرافی 2025 کی تیاریوں کا جائزہ لینے کے لیے کراچی کے بعد قذافی اسٹیڈیم لاہور پہنچ گیا۔ پی سی بی حکام نے آئی سی سی وفد کو انتظامات کے حوالے سے بریفنگ د ی ، وفد نے لاہور کے نجی ہوٹل کا وزٹ کیا۔ آئی سی سی ایونٹ آپریشنز کی سینئر مینجر سارہ ایڈگر، منیجر عون زیدی نے اسٹیڈیم کا جائزہ لیا جبکہ آئی سی سی ہیڈ آف ایونٹس کرس ٹیٹلے راولپنڈی میں ٹیم کو جوائن کریں گے۔ واضح رہے کہ گزشتہ روز آئی سی سی کے وفد نے چیمپئنز ٹرافی 2025 کی تیاریوں کا جائزہ لینے کراچی کا دورہ کیا تھا۔ یاد رہے کہ آئی سی سی چیمپئنز ٹرافی فروری 2025 میں شیڈول ہے، جس کی میزبانی پاکستان کرے گا۔ چیمپئنز ٹرافی 2025 میں کل 8 ٹیمیں حصہ لیں گی اور ایک روزہ بین الاقوامی٠ون ڈے انٹرنیشنل))طرز کی کرکٹ کھیلیں گی۔ آئی سی سی کے ایک روزہ کرکٹ ورلڈ کپ کے گروپ مرحلے کی سرِ فہرست 7 ٹیموں نے اس ٹورنامنٹ کے لیے اپنی پوزیشن محفوظ کر لی تھی جبکہ پاکستان نے بطورِ میزبان اس کے لیے کوالیفائی کیا۔ پاکستان میں ہونے والی 2025 چیمپئنز ٹرافی میں ویسٹ انڈیز، زمبابوے اور آئرلینڈ کی ٹیمیں شامل نہیں ہوں گی۔

کریڈٹ: انڈیپنڈنٹ نیوز پاکستان-آئی این پی