بنگلادیش کرکٹ ٹیم کے آل رائونڈر شکیب الحسن کو بولنگ ایکشن مشکوک ہونے پر انگلش کرکٹ بورڈ کے تحت ہونے والے مقابلوں میں بولنگ کرانے پر پابندی عائد کر دی گئی۔ بولنگ سے روک دیا گیا۔کرکٹ ویب سائٹ کے مطابق37سالہ شکیب الحسن کا بولنگ ایکشن کائونٹی چیمپئن شپ میں رپورٹ کیا گیا۔شکیب الحسن نے کائونٹی چیمپئن شپ میں سرے ٹیم کی نمائندگی کی تھی۔ میچ کے بعد سے بولنگ ایکشن کے متعلق تحقیقات کی گئیں۔ایک آزاد معائنے میں معلوم ہوا کہ شکیب کے ایکشن میں ای سی بی کے ضوابط میں تعین کردہ 15 ڈگری زاویے سے زیادہ خم پایا گیا۔ایکشن رپورٹ ہونے کے بعد شکیب الحسن کو انگلینڈ کرکٹ بورڈ کے مقابلوں میں بولنگ کرنے کے لیے معطل کردیا گیا ہے۔شکیب الحسن انگلینڈ کرکٹ بورڈ کے مقابلوں میں اپنا بولنگ ایکشن کلیئر قرار پانے تک بولنگ نہیں کر سکیں گے۔بنگلادیشی آل رائونڈر شکیب الحسن کو اپنے بولنگ ایکشن کا آزادانہ معائنہ کرانا ہوگا۔ انگلش بورڈ کی جانب سے جاری ایک بیان میں کہا گیا کہ شکیب ای سی بی کے تحت کرائے جانے والے مقابلوں میں بولنگ کرنے کے لیے اس وقت تک نااہل ہیں جب تک وہ اپنے بولنگ ایکشن کے معائنے کو پاس نہیں کر لیتے۔ واضح رہے شکیب الحسن ٹائٹل حریف سمرسیٹ کے خلاف اہم میچ کے لیے سرے کا حصہ بنے تھے اور دونوں اننگز میں نو وکٹیں حاصل کی تھیں۔

کریڈٹ : انڈیپنڈنٹ نیوز پاکستان-آئی این پی