بیلا روس کی نامور ٹینس سٹار اور عالمی نمبر تین آریانا سبالینکا نے پہلی مرتبہ ڈبلیو ٹی اے سنسناٹی اوپن ٹینس ٹورنامنٹ جیت لیا، انہوں نے رواں سال جنوری کے آسٹریلین اوپن ٹینس ٹورنامنٹ کے بعد اپنا دوسرا ڈبلیو ٹی اے ٹائٹل جیتا ہے،26سالہ بیلا رشین ٹینس سٹار نے خواتین کے سنگلز مقابلوں کے فائنل میچ میں امریکی حریف جسیکا پیگولا کو شکست دی، فائنل میچ میں بیلا روس کی 26سالہ آریانا سبالینکا نے انتہائی شاندار کارکردگی کا مظاہرہ کرتے ہوئے امریکی حریف جسیکا پیگولا کو سٹریٹ سیٹس میں 3-6اور 5-7سے شکست دے کر ٹورنامنٹ جیت لیا، اس فتح کے بعد ان کے ڈبلیو ٹی اے ٹائٹلز کی تعداد 15ہوگئی ہے۔ٹورنامنٹ جیتنے کے بعد سکائی سپورٹس کے بات چیت کرتے ہوئے آریانا سبالینکا نے کہا کہ انجری مسائل سے نجات پانے کے بعد رواں سال اپنا دوسرا ٹائٹل جیتنے پر بہت خوش ہوں ۔انہوں نے کہا کہ انجری مسائل کا سامنا کرنے کے بعد بڑی فتح کی توقع نہیں تھی تاہم ٹورنامنٹ کے دوران اپنی تمام تر توجہ کھیل پر مرکوز رکھی اور سخت محنت کی جس کا صلہ ٹائٹل جیتنے کی صورت میں ملا ۔سبالینکا نے کہا کہ وہ مستقبل میں بھی اپنی عمدہ کارکردگی کے تسلسل کو برقرار رکھتے ہوئے مزید فتوحات حاصل کریں گی۔آریانا سبالینکا سنسناٹی اوپن جیتنے والی دوسری بیلا رشین کھلاڑی بن گئی ہیں، ان سے قبل بیلا روس کی وکٹوریہ آزارینکا نے 2013کا سنسناٹی اوپن کا ویمنز سنگلز ٹائٹل جیتا تھا

کریڈٹ: انڈیپنڈنٹ نیوز پاکستان-آئی این پی